Kigutit nakorsaasa meeqqat persuttakkat naammattoortarpaat

Kommunip kigutigissaasuisa meeqqanut tunngasunik inuinnik isumagittoqarfimmut nalunaarsuisarnerat tallimariaatinngorsimavoq

Kigutit nakorsaat meeqqat inuusuttuaqqallu kigutaat passukkaagamikkit putusiuinnarneq ajorput.

Danmarkimi kommunit kigutileriffiisa meeqqat isumaginerlutat amerliartuinnartut naammattoortalerpaat, ilaatigut kimillannerit nassuiarneqarsinnaanngitsut, tungujornerit, naliginnaanngitsumik ersinerit eqqiluisaannginnerluunniit naammattoortalersimavaat, taama politiken marlunngornermi saqqummersumi allataqarpoq.

Misissuisimanerlu nutaaq malillugu meeqqat inuusuttuaqqallu unatartissimasut sumiginnagaasimasulluunniit amerliartuinnartut kigutit nakorsaasa sulisuisalu inunnik isumaginnittoqarfimmut nalunaarutigisalersimavaat.

Misissuineq danmarkimi atuarfiit kigutileriffiini kigutilerisut kattuffiata ingerlatarisimasaraat, taannalu malillugu meeqqat inuusuttuaqqallu 2008-miit maannamut isumaginnittoqarfimmut nalunaarutigineqarsimasut amerlassusaat tallimariaatinngorsimaneri atuarneqarsinnaapput.

- Peqqinnissaqarfimmi kisiartaalluta Danmarkimi meeqqat inuusuttuaqqallu 0-miit 18-nut ukiullit akuttunngitsumik takusarpavut. Taamaammat paasissutissanik nutaanik saqqumiisinnaagatta nuannaarutigaarput.

- Tassami isumaginninnermik ajornartorsiutinik sumiissusersiniaanerput iluatsissimavoq, taama pisortani kigutilerisut kattuffianni siulittaasoq Anne Kaae-Nielsen Politikenimut oqarpoq.
Kisitsisillumi nutaat malillugit ukiut pingasut matuma siorna agguaqatigiisillugu kommune ataatsimi kigutilerisut 1,4-iarlutik inunnik isumaginnittoqarfimmut nalunaarsuisarsimapput, ukiorlu manna nalunaarutigisaat 6-t 7-llu akornannut qaffariaateqarsimallutik.

Aarhus Universitetshospitalimi nakorsaaneq Hanne N. Christensenip meeqqat ajortumiikkat sullissisorivaat, taassumalu oqarnera malillugu meeqqat timikkut ajortumiikkat 60 procentii niaqqukkut qungatsikkullu ajoquserneqartarput.

Asserssuutigalugu siutikkut tungujornernikoq peqqinnissaqarfimmi sulisup imaaliallaanaq takusinnaavaa:

- Meeqqap siutaata nataqquani tungujornersimappat taava meeraq sikkilinik uppiinnarsimassanngilaq. Tassami orlugaanni siutip aqitsortaa kisimi tungujornertarpoq, taama Hanne N. Christensen naggasiivoq.

Powered by Labrador CMS