Leiv Eiriksson qillerivissaminnut apuuppoq

Avatagiisinik illersuiniat qillerutip nuuata eqqaani puttasuliamiitillutik Leif Eirikssonip qillerinissani aallartissinnaanngilaa

Umiarsuaq qilleriviutigisoq Leiv Eiriksson avatagiisinik illersuiniat ilaaqqusaanngitsut marluk ilaasoralugit Atammiup avataani qillerivissamut apuussimalerpoq. Taama Greenpeace nalunaaruteqarpoq, massa Cairn-ermiut Leiv Eirikssonip sumiinnera suli nalunaarutiginngikkaluaraat.

Oqartussaasut palleqqusaanngitsumik qilleriviup eqqaani pilersitsereersimalerput, avatagiisinilli illersuiniat tassaniitillugit Cairn-ikkormiut qillerilersinnaanngillat.

twitter arcticPOD imaluunniit Cairn-ikkut qillerinissaanik akerliunermik nalunaaruteqarniaraanni http://bit.ly/I7YpLn attaveqarfigineqarsinnaasut Greenpeacermiut atuartartut kaammattorpaat.

Issittumi uuliasiorluni qillerinerit unitsinneqarlik, taama Greenpeace allappoq.

- Skotlandimiut uuliasiorfiutileqatigiiffeeraat Kalaallit Nunaata sineriaata avataani uuliamik qalluinissarsuarmik isumalluarlutik suna tamaat sakkugalugu sukataarput. Cairn-ikkormiulli nunarsuarmi maleruagassat sakkortunersaat atornerarlugit kalaallinik eqqissisaassaqqaartut nalunaarusiat atuarlualaaraanni paasisassat allaanerujussuupput, taama Greenpeace oqaaseqarpoq.

Avatagiisinik illersuiniaqatigiit ippassaq umiatsiat pullattakkat atorlugit Esperanzamiit aallarput, Leiv Eirikssonilu nunatsinnut tikiummalli malittariuarsimasaat ikkivigaat puttasuliarlu ikkullugu, taamatut pisoqarnerani sakkutuut imarsiortut alapernaarsuutaat Vædderen sanioqqutiinnariarlugu iliuuseqarnerat iluatsippoq qillerivissuarlu 53.000 tonsinik angissusilik tassa ikkivigalugu. Puttasuliaq qillerutip nuuaniit ungasinngitsumut inissinneqarpoq, taamaasillunilu Cairn-ip nunatta imartaani uuliasiornissaralua unitsinneqarsimalluni.

- Leiv Eiriksson uuliamik qilleriviit nunarsuarmi oqallisaanerpaartarilernikuuaat. Uuliasiorfiillu allat issittumi qillerinissaminnut tunuarsimaassaqqaartut Cairn-ikkormiut 1500 meterinik ititigisumi qillerinissartik avannarpasissuserlu 71-imit avannarpasinnerusumi decembari angullugu qillerissamaarput. Tassa Cairn-ikkormiut kalaallit nunaata pinngortitaa pinnguariinnarpaat tassalu uagut, DMU, kalaallit aalisartui, Obamap uulia pillugu ataatsimiitaliarsua, Canadian National Energy Board, tuluit nunanut allanut ministeriaqarfiat tusaajumanagit. Taamaammat maanna iliuuseqarpugut, taama Greenpeacep silap pissusaanut tunngasunik suliaqartartua Jon Burgwald oqarpoq nangillunilu. - Cairn-ip qillerinissai ulorianangaarmata pisussaanngikkaluarpulluunniit.

Cairnip nunatsinni iliuuserisimasai tamarmik Jon Burgwaldip malinnaavigisimavai.

Leiv Eiriksson Atammiup tungaanut aallarluni Nuuk avaqqukkaalu avatagiisinik illersuiniaqatigiit qillerivimmut ikipput.

Tamaani Leiv Eiriksson 905 meterinik itissusilimmi qillerissamaarpoq.

Leiv Eirikssonip qillerivissaminut apuunnissaanut nal. akunnialuinnanngortullu avatagiisinik illersuiniaqatigiit qillerivimmut ikipput puttasuliarlu 3 meterinik siumut tukimullu angissusilik ikkullugu, taanna attaveqarniarnermi atortorissaarutinik nerisassanillu ullorpassuanut naammattunik useqarpoq. Puttasuliaq uuliasiorfimmiittuartillugu Leiv Eiriksson qillerisinnaanngerluinnarpoq.

Avatagiisinik illersuiniaq Luke 25-nik ukiulik qillerutip saniatunginnguani puttasuliameeqataasoq ima oqaluttuarpoq:

- Imaq atitsinniittoq nillertupilussuuvoq, issittulli imarsua akornutiginatigu maani puttasuliami toqqissisimalluta ilorrisimaarpugut. Uuliasiorniaqatigiit iliuuserinialersaagaat ikilluta unitsissinnaagatsigu tulluusimaarutigaara, taama Luke Greenpeace malillugu oqaaseqarpoq.

Powered by Labrador CMS