Arnat persuttakkat ikiortinniaraangamik namminneq akiliisarput

Arnat persuttagaasimasut qimarnguinniittut sisamararterutaannaat akiliunneqarlutik tarnip pissusaanik ilisimasalimmik ikiorserneqartarput. Angutilli persuttaasartut akeqanngitsumik ikiorserneqartarlutik

Arnat aapparminik persuttarneqartartut tarnip pissusaanik ilisimasalimmik ikiorserneqartartut ikittuinnaapput.
Massa angutit persuttaasartut tarnip pissusaanik ilisimasalimmik ikiorneqarnissartik pisinnaatitaaffigissaqqaaraat, arnat persuttakkat qimarnguinniittut ikiorserneqarnissaminnut pisinnaatitaaffqanngitsut, taama aviisi ullormut saqqummersartoq Information allaaserisaqarpoq.

Røde Korsip misissuititsisimaneranit nalunaarusiaq atuaraanni, arnat persuttagaasimasut 500-t 20 procentiinnai tarnip pissusaanik ilisimasalimmik ikiorserneqartarsimapput. Tamannalu naammaqqajanngilaq, taama Røde Korsimi allattaaneq Anders Ladekarl isumaqarpoq.

- Tassa kisitsisit appasipput, sualummik arnat affaat ikioqqullutik noqqaassuteqartartut nalunagu.
- Soorunami angutit persuttaasartut ikiorniarsarinissaat isumatusaarneruvoq, taakkuli kisimik ukkinneqartarnerat puaatsoornarpoq, tassami persuttarneqarsimasut tarnip pissusaanik ilisimasalimmik ikiorserneqarnissaanut periarfissaqqanngimmat, Anders Ladekarl oqarpoq.

Danmarkimi arnat qimarnguiisa kattuffiani LOKK-mi siulersuisut siulittaasua Birgit Søderberg aamma isornartorsiuivoq:

- Persuttagaanermik kingunerluttitsisimasut tarnip pissusaanik ilisimasalimmik ikiorserneqarsinnaanermik pisinnaatitaaffeqannginnerat eqqumiiginakujuppoq.
Politikerili aningaasaq kisimi suli ukkitaraat.

Nakorsap isumaginnittup tarnip pissusaanik ilisimasalimmut innersuussisinnaatitaanerat, arnarlu persuttagaasimasoq akissaqanngikkaangat kommunip aningaasatigut tapiissuteqarsinnaanera Dansk Folkepartimi inunnik isumaginninnermut tunngasunik oqaaseqartartuata Pia Adelsteenip innersuussutigiinnarpaa:

- Akeqanngitsuunissaanik oqarataarnissap ila ajornanngikkaluassusaa, aningaasartassaali nassaareqqaartariaqarpavut. Inuilli qanoq akissaqartiginersut qimerlooqqaassallugu pissusissamisuussaaq, pisortammi nulia unatartippat tarnip pissusaanik ilisimasalimmik ikiorserneqarnissi nammineq akissaqartissaqqaarmagu.

Powered by Labrador CMS