Timmisartuussinissat nalornissutaasut
Arfininngorpalli sapaatiuppallu Air Greenlandip timmisartuussinissani naatsersuutigaa
Innermik anitsisartup arsakuit nunatta silaannaqarfiani ajornartorsiortitsijuarsinnarput. Kitaani Qaanaamiit Nuuk tikillugu kangimullu sermersuup ilaani silaannaq 6 kilometerinik portutigisoq angullugu akunnattumik arsakoqartutut nalilerneqarsimammat immikkut akuersissummik peqqaarluni timmisoqarsinnaavoq. Taama Naviair paasissutissiivoq.
Aasianniit Ilulissat aqqusaarlugu avannamut Qaarsut tungaanut silaannaq 6 kilometerinik portutigisumiittoq matoqqalluinnarpoq. Aamma Qaarsuniit Upernaviup kangiata tungaanut sumiiffik timmisartorfioqqusaanngitsoq Naviair-ip ilanngullugu nalunaarutigaa.
Akunnerulli naanissaanut Air Greenlandermiut isumalluarput, arfininngorpat sapaatiuppallu pilersaarutit malillugit timmisartuussinissartik naatsersuutigimmassuk. Ilimasaarutillu nutaajunerpaat malillugit isumalluarsinnaarpasipput.
Taamaamat Air Greenlandip ilaasuminik ikiuerusullutik oqarasuaatinik attaveqartarfiata ammasarneri sivitsorsimavaat:
Kalaallit Nunaanni: +299 34 33 35
• Tallimanngornermi nal. 08:00 – 20:00 (kitaata nal. malillugu)
• Arfininngorneq Sapaallu nal. 08.00 - 18.00 (kitaata nal. malillugu)
Danmark: +45 32 46 22 43
• Ataasinngornermiit sapaammut nal. 07:00 – 22:00 (danskit nal. malillugu)
- Tallimanngornermi ilaasussaagaluit ullup ingerlanerani arfininngornermi sapaammilu ilaasussanngornissaat pillugu attavigiumaarpavut. Ullunullu marlunnut ilaasussat nussortussanngoratsigit sapaatiuppat ilaasussat tallimanngornermi unnukkiartulerpat attavigineqassapput periarfissanillu tusarliivigineqassallutik, taama Air Greenland quppersakkamini http://www.airgreenland.dk/nyhedsvisning/?newsid=988 - mi allappoq.