Tallimanngornermi timmisartuussinissat tamarmik unitsiinnarneqarput

Tallimanngornermi maajip 27-iani nunatta, Atlantikullu silaannaqarfiani timmisartuussinissaraluit tamarmik arsakorsuit pisuullutik Air Greenlandip unitsiinartariaqalersimavai. Ilaasussat 1000-ingajaaat poortukkallu 20 tonsit taamaasillutik ingerlariaqqissinnaajunnaarput.

Taamaammat akunnerup naanerani immikkut timmisartuussisoqassaaq, ilaasussaagaluimmi poortukkallu piaarnerpaamik apuunneqarniassammata. Akunnerup naanerani timmisinnaanissamut ilimasaarutit ajorpasinngikkaluit tallimanngornermi timmisoqaqqusaanngilaq.

Taama Air Greenland tusagassiutinut nalunaarutaani allassimavoq.

Innermik anitsisartup arsakorsui Atlantiku avannarliup ilarujussuanut siaruaassimavoq, Nuummiillu avannamut aamma timmisartorfioqqusaajunnaarsimalluni. Air Greenlandillu naqissusiinera naapertorlugu ilaasunut timmisartunullu isumannaallisaaneq salliutinneqarmat timmisartuussisoqarsinnaanngilaq. Timmisartuusisartoqatigiit oqartussaasunut, timmisartuliortartunullu ataavartumik attaveqartarput, suna isumannaatsuunersoq qulakkeerniassammassuk.

Ullumi kitaata nalunaaqutaa malillugu ualippat kujammut, kiisalu Narsarsuarmiit Nuup tungaanut timmisartuussisoqarsinnaanera ilimagineqarpoq.

Air Greenlandimilu tuniniaanermi pisortaq Christian Keldsen ima oqarpoq:

- Periarfissat allat qimerloorsimavagut, Canadaliarnissarli Islandiliarnissarlu ajornarluinnarput. Tassa ilaasussat unittoorsimasorpassuit timmisartuussinnaanngilagut, aammami timmisartoqarfiit miffigineqarsinnaasut amerlanngimmata isumannaatsuusorisimanngilarput. Timmisartut marloriaammik timmitissinnaanngilagut arfininngornermilu atlantukkoortaammik attartorsinnaanata, tassami ilaasussarpassuit Kalaallit Nunaanni tamaneersuummata timmisartuutivut naammaqqajanngillat. Arfininngorpalli sapaatiuppallu arsakut ajornartitsissanngippata timmisartuussiumaarpugut, taamaammat ilaasussagut naammagittarallaannaqqusinnaavagut.

Air Greenlandillu timmisartuussinissaanut allannguutissat ilaasussaminnut nalunaarutigiumaarpaat.

Tallimanngorneq maajip 27-iani atlantiku qulaallugu timmisartortussaagaluit qanorluunniit bilitseqarnerat apeqqutaatinnagu akiliutitik utertissinnaavaat imalunniit ilaanissartik ullormut allamut nuussinnaallugu. Nunattalumi iluani timmisussat sapaatit akunnerani uani aamma akiliutitik utertinngikkunikkit ilaanissartik ullormut allamut nuussinnaavaat. Taamaasiornissarlu quppersakkamut www.airgreenland.gl. - imut iserluni ingerlaannaq iluarsineqarsinnaavoq.

Ilaasussaagaluit eqqugaasut Air Greenlandimut sianerfissartaarsimapput. Nunatsinni uunga sianertoqarsinnaavoq: +299 34 33 35 ullaakkut 7-niit unnukkut 21.00 tungaanut, Danmarkimilu oqarasuaatip normua: +45 32 46 22 43 danskit nalunaaqutaat malillugu ullaakkut 7-niit 22.00 tungaanut attaveqarfigineqarsinnaavoq.

Poortukkat Nuummukartussat 6,9 tonsit Kangerlussuarmi unittooqqapput allallu avannamukartussat 2,5 tonsit aamma uninngasuutigineqarlutik. Taakku saniatigut poortukkat 10 tonsit tallimanngornermi Danmarkimiit nunatsinnukartussaagaluit aamma uninngasuutigineqarput.