Ilulissani takornarissanik sullissivik nutaaq pilersinneqarsimavoq

Takornariat ornigannaavat Ilulissat takornarissanik sullissivimmik nutaamik peqalerpoq, sullissiviullu aqqa tassaavoq "Ilulissat Xpress".

Takornarissanik sullissivittaaliortitsisoq tassaavoq Ole Dorph, taanna Qeqertarsuup tunuani, minnerunngitsumillu Ilulissani ukiorpanngulersuni nunat allamiut suleqatigalugit takornarialerinermik ingerlatsereerpoq.

- Ilulissani takornarissanik sullissivittaaq nunaqavissunik 100 procentimik pigineqarpoq, sullissivillumi taamaattoq politikerit takornariarpassuillu kissaatigijuarsimavaat, taama Ole Dorph tusagassiutinut nalunaarusiaani allassimavoq.

- Takornarissanik sullissivittaap neqeroorutissai ilaatigut siornatigut neqeroorutigineqarsimanngitsunik ilaqarput. Ilulissat Xpress nutaavissuarmik takornarissanik assartuutissamik 10-nik issimasoqarnissamik akuersissutilimmik pissarsereersimapput, angallatitaassallumi Ilulissat Oqaatsullu eqqaani angalasussatut naatsersuutigineqarpoq. Angallat junip 12-ni Ilulissanut tikiunneqarpat aqaguani angallassilluni aallartissaaq.

Nunaqarfiup oqaluttuassartaa pingaaruteqarpoq

Takornarissanik sullissivittaassami nunaqarfik Oqaatsut pingaartinneqartussaavoq, nunaqarfillu aaqqissuussarpassuarnut aallaaviusussaalluni.

Ilulissat Xpress Oqaatsuni hoteliutitaassamaarpoq, hotelissallu atissaa tassaavoq "Nordlys - arsarnerit" imaluunniit "Neriusaaq" sapaammilu junip 5-ni hoteli tallimanik ineeralik ammarnersiorneqarumaarpoq.

Nunatta oqaluttuassartaata annersaa nunaqarfinniit aallaaveqarpoq. Taamaammat takornarissanik sullissivittaami piginnittup nunaqarfiit oqaluttuassartaata takornarissanut oqaluttarineqarnissaa pingaartippaa.

- 1968-i tikillugu nunatta inuisa 48 procentii nunaqarfinni najugaqarsimaneri eqqaamasariaqarput, ullumikkummi nunatta innuttaasa 10 procentiinnai nunaqarfimmiuupput, taama Ole Dorph erseqqissaavoq.

Ilulissat Xpress pillugu paasissutissat iluxpress.com-imi atuarneqarsinnaapput.