Innermik anitsisartoq suli ulorianarpoq
Naak Islandimi innermik anitsisartup Grimsvötnip anitsinera annikilligaluartoq ujarassiuup islandimiuusup suli ulorianarsoraa
Vatnajökullimi sermip ataani innermik anitsisartoq Grimsvötn maanna anitsivallaarunaarsimalerpoq, allaallumi anitsiunnaavittutut imaluunniit anitsiunnaalivissutut nalilerneqarsimalluni.
Sulili ulorianarsinnaavoq, taama Islandip ilisimatusarfiani ujarassiornermut professori Magnus Tummi Gudmundsson oqaluttuarpoq.
- Massakkorpiaq susoqarpalunngilaq, taamaaginnassappallu anitsiunnaarsimanissaa ilimanaateqarsinnaavoq, taama Magnus Tummi Ritzauimut oqaluttuarpoq nangillunilu:
- Innermik anitsiniinnassappat taava annikitsuinnaassaaq. Tassami qaarsoq aannikoq magma qummut igeriunnerartarunnaarsimammat.
Professori islandimiuusoq innermillu anitsisartunik ilisimasaqarluartuusoq unnuaroruttoraa timmisartuaqqamut ilaalluni innermik anitsisartoq aatsaavissuaq qimerlooriartorsimavaa.
Taamaasineranilumi innermik anitsisartoq suli anitsillattaaraluarsimavoq, unnualli ingerlanerani sakkukilliartuaarsimalluni.
- Ullup ingerlanerani Grimsvötnimut timmisartumik alakkallattaarumaarparput. Arsakunimmi katersuinissarput pingaaruteqarpoq, taakkumi atorlugit innermik anitsineq naliginnaanngeqisoq paasisaqarfigilluarniassagatsigu, taama Magnus Tummi oqaluttuarpoq.
Quleriaammik sakkortuneruvoq
Professorillu oqaasii naapertorlugit Grimsvötnimi innermik anitsinerup sakkortussusaa innermik anitsisartup Katlap sermip Myrdalsjökullimiittup anitsisussatut ilimagineqartup sakkortussusissaatut sakkortuseqarsimanera nallersuunneqarpoq. Grimsvötnilu innermik anitsimmat siorna innermik anitsisup Eyjafjallajökullip anitsineraniit quleriaammik sakkortunerusimavoq, Eyjafjallajökullilu anitsimmat europami timmisartuussinerit sapaatit akunnera ataaseq uninneranik kinguneqarsimavoq.
Grimsvötnimili innermik anitsineq maanna annikilleriarujussuaraluartoq imaanngilaq ajoqutigisinnaasai suli qaangiutinngillat.
Arsakoq europami - sualummik Tysklandip avannaatungaani - timmisartuussinermut massakkorpiaq akornutaasoq innermik anitsinerup ulluani siullermi anitsinermeersuuvoq.
Innermik anitsisartoq Grimsvötn arfininngormat unnukkaa anitsilluni aallartippoq, piffissallu sivikitsuinnaap ingerlanerani Islandip kujataatungaani nunap ilaa 5000 kvadratkilometerinik annertutigisoq arsakorsuamik 5 centimeterit angullugit issussusilimmik poorsimallugu.