"Kemikaliat aappaluttut" akuerineqartut
Cairn Energy-kkormiut akuutissaq Ultrahip uuliasiornerup nalaani atortussanngorpaat, akuutissarli taanna kemikaliat piumaneqanngitsut allattorsimaffianiittuuvoq.
Ajunngilaq, tassami periarfissat allat suli ajornerummata, taama DMU isumaqarpoq.
Cairn Energykkormiut akuutissaq Ultrahip nunatta imartaani uuliasiorneranni atussamaagaat nunat tamalaat ulorianartutut nalilersimavaat.
Taamaattorli DMU-p tassa Danmarkimi Avatagiisinik Misissuisoqarfiup akuersaarpaa, tassami periarfissat allat suli ajornerummata.
Tamanna atuagassiami Ingeniøren-imi ilanngunneqarsimasumi atuarneqarsinnaavoq.
Cairn Energy-kkormiut sisamariarlutik uuliasiorlutik misileraallutik qillerilerpata Ultrahip-imik atuinissamik akuersissut Namminersorluni oqartussaniit pissarsiarisimavaat.
Qillerinerup nalaani maqulluk Ultrahip-imik akulik uuliasiorfiup atussamaarpaa. Maqulluup qillerut perrassartarpaa, saniatigullu qaarsortamerngit piiarneqartut qummukaannerini atorneqartarluni. Aamma qillerinermi putup assigiiaaginnarmik naqitsineqarnissaa maqulluup isumannaartarpaa.
Tassa qillerisoqartillugu avatagiisinut kinngunerusinnaasunut nalunaarusiaq tunuliaqutaliullugu akuersissut DMU-p namminersorlutik oqartussat sinnerlugit tunniussimavaat, taama ingeniørenimi allaaserisaqartoqarsimavoq.
Europami nunat kemikalianut immami atorneqartussani nalilersuutigisartagaanni Ultrahib aappaluttumik qalipaaserneqarsimavoq - tassa ajornerpaap tulleralugu. Akuutissaq taanna toqunartoqanngilaq, tassami aalisakkanut uumasunullu immap naqqaniittunut allanut ulorianaateqarani, sivisupilussuarmilli akuutissaq nungukkiartuaartarmat aappaluttumik qalipaatilittut nalilerneqarsimavoq.