Uuliasiornermi akisussaaffeqanngitsutut iliuuseqarneq nittarsarpaa
Issittumi uuliamik mingutsitsisoqassangaluarpat ajoquseerujussuarnissaata Tuluit naalakkersuisuinit nalunaarutigineqarnera isertuunneqaraluartup saqqummiunneqarnerani, Kujataata imartaani qilleriviup Leiv Eiriksson-ip eqqaanut Greenpeace-p umiarsuaatai marluk inissipput
Avatangiisinik illersuiniaqatigiiffik nittartakkamini taamatut naunaarpoq.
Canada-p USA-llu Issittumi qillerititsinissaraluatik unitsikkaat, Norgellu imaani sikulimmi qillerititserusunngitsut, Skotland-imiut ingerlatsiviat Cairn Energy, siorna qillerinerminiit itinerusumi, avannarpasinnerusumi kiisalu ukiaanerusukkut qillerissamaarpoq.
- Mingutsitsinermut, isumannaallisaanermut pisortatigullu paasissutissiisarnissamut Cairn piviusorpalaanngitsumik isummertarpoq, Greenpeace-mi silap pissusaa pillugu kiisalu suliniutinut pisortaa, Jon Burgwald, oqarpoq.
- Assersuutigalugu oqaatigaa, Cairn-ip ataasiaannarluni qilleriguni, ukiup ataatsip ingerlanerani Norgemiut qallunaallu katillutik kemikalianik ulorianartunik aniatitsisarnerattuut aniatitsissasoq. Uuliamik mingutsitsisoqaraluarpat sikumullu akulerulluni taassuma qanoq piiarneqarnissaa, imaluunniit uuliamik mingutsitsisoqarnissaanut upalungaarsimatitani pillugit tamanut nalunaaruteqarnissaq pillugu, Cairn-ip qanoq isummerfigissanerlugu oqaatigerusunngilaa. Ajutoortoqarpat Kalaallit Nunaat ingerlaqqeriarsinnaajunnaassaaq, taanna naliliivoq.
Tuluit naalakkersuisuisa taamatut aamma naliliinerannut uppernarsaatit, Greenpeace-p pisimasut pillugit takussutissanik piumanermigut pisimavai.
Tuluiti silap pissusaa nukissiornerlu pillugit ministerip atorfilittaasa e-mail-ikkut nalunaarutaanni ilaatigut allassimavoq, “Sumiiffinni tamaani mingutsitsisoqartillugu ikiortissarsiornissaq ajornakusoorpoq, minguiaanissarlu ajornavissungajattutut oqaatigisariaqarluni”.
Pappiaqqani allani atuarneqarsinnaavoq Issittumi qillerinerit “teknologi-p angallavigineqarsinnaasutullu ilisimaneqartut killeqqissaanni” ittumik iliuuseqarnertut nalilerneqartut.
Atorfilittat paasissutissiineranni ilaatigut atuarneqarsinnaavoq “Issittumi uuliamik mingutsitsisoqaraluaruni sunniutaasinnaasut annertunerussapput, tamaani nillernerunerata (ukiukkut) seqinnerpallaartannginneratalu bakteriat uuliatortut (Deepwater Horizon-ip mingutsitsinerani minguiaanermi pingaaruteqaqisut) akornusissammagit. Issittumi pinngortitaq sunnerneqajasuuvoq mingutsitsisoqarnissaanullu upalungaarsimatitat Mexico-p kangerliumarngani suleriarnerminniit arriinnerusumik ajornarnerusumillu suleriartussaassallutik, sumiiffik avinngarusimasumiimmat issittartumiillunilu.
- Cairn akisussaassuseqanngitsutut iliorpoq. Cairn-ip Tuluit naalakkersui, Obama-p uuliamik mingutsitsineq pillugu isumalioqatigiissitaa, allalluunniit Issittumi uuliasiornerit ajutooriataarsinnaanerat aseruerujussuarsinnaanerallu pillugit tamaani uuliasioqqusinngitsut tusaarusunngilai, Jon Burgwald oqarpoq, nangilunilu:
- Taassuma saniatigut Cairn matoqqalluinnartumik ingerlatsivoq, qitiusutullu paasissutissat uuliasiortoqartillugu nalinginnaasumik tamanut ilisimatitsissutaasaraluartut Cairn-ip saqqummiukkusunngilai. Cairn-ip pissuserlulluni Kalaallit Nunaanni ajoqusiisinnaanera nunarsuatsinni tamanit eqqumaffigineqartariaqarpoq.
Arctic Sunrise umiarsuup nittartagaata assiliissutaatigut malinnaaffigisinnaavat: http://www.greenpeace.org/international/en/multimedia/ship-webcams/Arctic-Sunrise-Webcam/
Greenpeace-p Tuluit Nunaanni nittartagaatigut atuarneqarsinnaavoq, Esperanza-p qillerissut Leiv Eiriksson, 53.000 tonsitut oqimaatsigisoq manna malittarigaa. Greenpeace-p qillerissut ujaaralugu, Nunatta kitaanut sineriaaniit 200 sømil-itut avasitsigisumiittoq ippassaq unnukkut nassaaraa, umiarsuarmik alapernaarssuummik malitseqartoq. Umiarsuaq alapernaarsuut sorleq Leiv Eiriksson-imik malinnaatinneqarnersoq Greenpeace-p nalunaarutiginngilaa.
Greenpeace-rmiut taamatut allapput, una qulequtaliullugu: ARCTIC STAND-OFF: GREENPEACE SHIPS CONFRONT WORLD’S MOST CONTROVERSIAL OIL RIG
Greenland, 24th May 2011– Two Greenpeace ships are in a tense stand-off with Danish navy commandos protecting an oil drilling operation in the freezing seas off Greenland.
Tuluttut nalunaarut tamaat una aqqutigalugu atuarsinnaavat: www.greenpeace.org.uk/media/press-releases/arctic-stand-greenpeace-ships-confront-world’s-most-controversial-oil-rig-20110524
Nutserisoq Ulf Fleischer