Timmisartorneq suli akornusersorneqarpoq
Nunatsinni silaannaap ilarujussua angallavigeqqusaajunnaarpoq - Qeqertarsuup Tunua Uummannarlu eqqugaapput
Naviair maannakkut nalunaarpoq, Island-imi Grimsvötn-imi innermik anitsisartup arsakui Kalaallit Nunaata silaannartaanut siaruaakkiartuinnartut.
Taamaammat ualeru nal.16.00-ip tungaanut 6 kilometerisut portussusillip angallavigeqqusaajunnaarnissaa Angallannermut Nakkutilliisoqarfiup aalajangerpaa. Naviair nalunaarpoq, arsakut kimmut Ilulissat tungaannut, avannamullu Qaarsut tungaannut kiisalu kitaanut, Nerlerit Inaata avannarpasinnerusortaanut siaruaattut.
Qaqugukkut arsakut sumorpiaq pinersut, timmisartuutileqatigiinnut mittarfinnullu nassiussorneqarput.
Arsakut Danmarkip silaannartaa aamma sunniuteqarfigaa.
Silassamik nalunaarutit kingulliit aallaavigalugit arsakoqarfiup sumut siaruaannissaata naatsorsoreerneratigut, Danmarkimi silaannaap ilaata, 6 kilometeritut portutigisoq qulaallugu angallavigineqannginnissaa sivitsorneqarpoq. Pineqartoq tassa Nordsø-p avannarpasinnersaa, Skagerak, Thy-p ilaa kiisalu Aalborgip avannaata kitaa. Silaannartaq tamanna nal. 14.00-miit 16.00-ip tungaanut matoqqassasoq (24. Maj 2011 sumiiffimmi nalunaaqutaq), Naviair-imiit nalunaarutigineqarpoq.
Nutserisoq Ulf Fleischer