Askesky betyder flere aflysninger

Islandimi innermik anitsisartup arsakui pissutaallutik Air Greenlandip marlunngornermi nunatta iluani Danmarkillu tungaanut timmisartuussinissaralui tamarmik unitsiinnarneqarput.

Københavnimut utimullu marlunngornermi maajip 24-iani timmisartuussinissaraluisa unitsinneqarnerisa saniatigut Danmarkiliartussanik nunatta iluani timmisartuussinissat tamarmik aamma unitsinneqarsimapput.

Timmisartoqqusiunnaanermik eqqugaasut timmisartortoqarsinnaanngoqqippat salliutinneqarumaarput. Marlunngornermilu Danmarkiliartussaagaluamut ilaasinnaajunnaartut Air Greenlandip nammineerluni sms-ikkut, email-ikkut oqarasuaatikkulluunniit attaveqarfigiumaarpai.

Ataasinngornermi ilaasussaagaluit eqqugaasut Air Greenlandip quppersagaanut iserlutik paasissutissanik aallersinnaapput, aatsaallu timmisartuussinerit ingerlaleqqippata Air Greenlandimit attaveqarfigineqarumaarput.

Islandimi innermik anitsisartup Grimsvøtnip anitsinera pissutaalluni Air Greenlandip timmisartuussinissaanut ulorianarsinnaaneranik massakkorpiaq nalilerneqarsimavoq. Air Greenland atlantiku avannarlermi massakkorpiaq nunniffissaqanngilaq, arsakummi qummut 15 kilometerit angullugit portussusilimmiipput, taamaammallu timmisartuussinissaq imminut illersorneqarsinnaanani, taama Air Greenland nalunaaruteqarpoq.

Nunatta iluani assartuussineq eqqugaanngilaq, Atlantikuli qulaallugu assartugassat ulloq ataasiakkaarlugu matoqqatinneqarpoq. Taamaammat marlunngornermi maajip ulluisa 24-ianni atlantiku qulaallugu assartugassanik tunniussisoqarsinnaanngikkallarpoq.

Powered by Labrador CMS