Nerlerit Inaata matugallarneqarnera sivitsorneqarpoq

Ullumi ataasinngornermi innermik anitsisartup arsakui kimmut nunatsinnut apuutissapput

Illoqqortoormiut nunataani Nerlerit Inaanni timmisartoqqusiunnaarallarneq ullumi nal. 10-t tungaanut sivitsorneqarallarnera Naviair-ip nalunaarutigaa. Timmisartoqqusiunnaarallarneq ippassaq ualikkut aaliangiunneqarmat siullermik unnukkut quliniit ullaakkut sisamat tungaanut atuussimagaluarpoq, maannali tassa ullaap tungaani nal. 10:00 tungaanut sivitsorneqarallarsimavoq.

Londonimi innermik anitsisartut arsakuinik nakkutilliisoqarfik "Vulcanic Ash Advisory Center" nal. akunneri arfinilikkaarlugit nutaamik ilimasaarusiortarput, ullaarlu kitaata nalunaaqutaa naapertorlugu sisamanngortorlu ilimasaarut kingulleq saqqummiussimavaat.

Ilimasaarusiaq naapertorlugu innermik anitsisartup arsakui kimmut nunatta tungaanut illuariartussangatinneqarput. Ilimasaarusiamilu aappaluttumik qalipaatilik uagutsinnut soqutiginaateqarpoq, arsakummi qummut 6 kilometerinik portussusilimmiittut tassani takuneqarsinnaammata.

Aamma innermik anitsisartup arsakui kitaanut unnukkut apuunnissaat ilimasaarutaasoq takuneqarsinnaavoq. Unnugu nal. 22:00 ilimasaarut nutaajunerpaaq saqqummiunneqassaaq.

Powered by Labrador CMS