Qalasersuaq avannarlilerngusaanneq nutaajunngilaq
Danmarkip qalasersuarmut avannarlermut aatsavissuaq piginnittunngorniuunnerangaanera Danmarkip nunanut allanut ministeriata eqqunnginnerarpaa
- Issittumut tunngassuteqarsinnaasunik ataatsimoorussamik najoqqutassaqalernissaq Danmarkip Kalaallit Nunaata Savalimmiormiullu massakkorpiaq sulissutigileruttorpaat. Najoqqutassap junip qiteqqunnerani piareereersimanissaa saqqummiunneqarnissaalu naatsersuutigaara, taama danskit nunanut allanut ministeriat Lene Espersen naalagaaffeqatigiit issittumi najoqqutassaat pillugu oqaaseqarpoq. Aamma Danmarkip qalasersuaq avannarlermik piumasaqarnera tusagassiorfiit nipituuliutigereeraallu ministerip oqaaseqarfigisimavaa, taannalu nunanut allanut ministeriaqarfiup nittartagaani atuarneqarsinnaavoq.
- Najoqqutassaq aatsaat suliarineqaleruttormat massakkorpiaq oqaaseqarfigisinnaanngilara, najoqqutassarmi Folketingimi partiit akornanni aamma oqallisigineqaqqaartariaqarmat massakkorpiaq eqqartornissaa pissusissamisuunngilaq.
- Unali oqaatigisinnaavara, qallunaat qalasersuaq avannarlermik piumasaqarnerat nutaajunngilaq. Nunalliuku tamat maleruagassaat maleqqissaarivut, uagullu pigalugit uppernarsaatissaqarsorisavut soorunami piumasarissavagut. Aamma nunat allat issittumiittut taamatorluinnaq iliorsimasut. Tassa qalasersuaq avannarlermi ilaatigut immap naqqanik ilumut piginnittuunerput uppernarsarsinnaanissaa naatsersuutigineqarpoq. Qalasersuarli avannarlermut piginnittunngornissaq immini anguniagassaanngilaq, taama nunanut allanut ministeri oqaaseqarpoq.
Danmarkip Nunattalu nunavissuit aallaavii immap naqqaniittut 200 sømilinillu avasinnerusumiittut pigilernissaanut piumasaqarnissaq kingusinnerpaamik 2014-inimi nunavissuit killeqarfiinik nunat tamat ataatsimiititaliarsuannut saqqummiunneqassaaq, saqqummiussinissarlumi FN-ip Imaani piginnittussaanermik maleruagassiaa maleqqinnaarlugu tamanna pissaaq, taama Lene Espersen paasissutissiivoq.
- Russit qalasersuup avannarliup nalaata tungaanut killeqarfissamik noqqaassuteqareernikuupput. Canadamiullu aamma tamatumunnga noqqaassuteqarnissaat naatsersuutigineqarpoq. Issittullumi imartaani saqitsaannerit naggataatigut isumaqatigiissutigineqallarumaartut, nunanut allanut ministerip oqaatigaa.
Issittumi najoqqutassartaassap ilaannakusiorneqarneranik allakkat, illersornissamut isumaqatigiissut, Ilulissanilu Oqaaseqaatiliaq uani takusinnaavatit