Nuuk timersortarfissuartaalerpoq
Timersortarfissuaq 150.000 koruuninik nalilik Aalborgip illoqarfittut ikinngutaanut Nuummut tunissutigivaa
Nuummi 150.000 koruuninik nalilimmik timersortarfissualiornissamik aningaasaliinissaq magistratermiut isumaqatigiissutigisimavaat, tunissuteqarnissarlu aggustimi Aalborg-ip ulluisa Nuummi ingerlanneqarnerini pissasoq nordjyske.dk allaaserisimavaa.
-Illoqarfittut ikinngutigaarput, Kalaallillu nunaannut atassuteqartupilussuvugut. Meeqqat inuusuttuaqqallu sammisassaqartinniartarneri imaannaanngitsuusoq nalunngilarput. Aamma hal-ip natissaanik ataasiarluta tunissuteqarnikuuvugut. Taamaammat meeqqat inuusuttuaqqallu iluaqutigisinnaasaannik tunissuteqarusulersimavugut, taavanilu Aalborgip ullui nalliusineqartussanngorneri iluatsiinnarparput, taama Henning G. Jensen (S) oqarpoq.
Ukioq 2008-mi Aalborgimi Kalaallit ulluinik qulequtserlugu aaqqissuussisoqarpoq, Aalborgilli ullui aggustusip 23-ianniit 28-iata tungaanut ukioq manna nalliusinneqartussanngorsimapput. Pisussanut aaqqissuussisut tassaapput Aalborgip Kommunea, Aalborgip Talittarfia, Nuuk kiisalu Namminersorluni Oqartussat.