Talit qullarnissaanut suli siusippallaarpoq

2009-mi 1 milliard koruuninik amigartoornermiit 2010-mi 2 million koruuninik sinneqartoornermut

Maliina Abelsen: – Koalitionens målsætning om at få den grønlandske økonomi tilbage i balance er lykkedes.

Nunatta karsia 2010-mi 2 million koruuninik sinneqartooruteqarpoq.

Nunatta karsia 2009-mi aatsaat taama amigartooruteqarmat ilaatigut Royal Greenlandimut 500 millioninik annaassiniarluni tapeereersorlu nunatta karsia ajalusuupajaaraluarluni sarfaa tupinnaannartumik illuanut saatinneqarpoq, tassa naalakkersuisooqatigiit peqatigiillutik 2010-mi ilungersuuteqarnerisa kingunerisaanik ilaatigut sukangasuumik tulleriiaarineq ingerlatereerlugu millioninik marlussunnik karserput sinneqartooruteqarpoq.

- Ajugaasimaarnissamulli suli piffissanngunngilaq, sulimi sivisuumik ilungersuuteqaqqaarluta nunatta karsia ilorfaap tungaanut aatsaat iluamik aallartissinnaagatsigu, taama aningaasaqarnermik naalakkersuisoq Maliina Abelsen, IA-meersoq naatsorsuutinik marlunngormat saqqummiussinermini sissueqqusivoq.

Maliina Abelsenip aningaasarsiornermik ataatsimiitaliarsuup innersuussissutai qimerlooqquai, ilaatigut utoqqaliartortut amerliartuinnavinnerat tikkuartorlugu, taakkumi 2040-mi 30 milliardinik aningaasaqarniarnitsinnut nikingatitsisussanngussammata. Tamannalu pakkersimaarniaraanni taava ukiumut 1 milliard koruuninik aningaasaqarniarnerput pitsanngoriaateqartariaqartassaaq, taamaammallu nunatta karsia 2010-mi 2 million koruuniinnarnik sinneqartooruteqarsimanera taasariaqarluni.

- Ukiumut agguaqatigiisillugu 1 milliard koruuninik nassaarniartariaqarpugut, taamammallu aningaasartuutinik naatsersuutit amigartoorutaaffiunngitsunut alloriarnerit massuma siullersariinnarpaat, taama Maliina Abelsen oqarpoq.

Ataasiaannarluni isertitat

Nunatta karsia 2010-mi 6.185.000.000 koruuninik isertitaqarsimavoq, tassalu naatsersuutigisamiit 146 million koruuninik amerlanerusimallutik. Akileraarutitigut isertitaqarnerulersimanerup, pisortallu aningaasartuutikinnerulersimanerat tamatumunnga pissutaavoq, ataasiaannarlunili isertitat 175 million koruuninik nalillit isertinneqaqqittussaanngillat. Assersuutigalugumi 75 million koruunik 2009-mi aningaasartuutissanut ilanngutinngitsoorneqarsimapput aatsaallu 2010-mi ilanngunneqarlutik, tamannalu kukkuneruvoq erseqqarissoq, taama Maliina Abelsenip oqarpoq.

Nunatta karsia 6.183.000.000 koruuninik 2010-mi aningaasartuuteqarsimavoq, naatsersuutigisamiillu 119 million koruuninik annikinnerusimallutik. Ilaatigut inatsisitigut pitutukkanik aningaasartuutit ikileriarsimanerisa tamatumunnga pissutaapput, tassami pensionisiassanut inigisamullu tapit qanorpiaq annertutigissanersut siumut takorlooruminaassimammat. Allaffissornerlumi aamma pitsanngorsaavigineqarsimavoq: - Aningaasartuutissavummi ikilisarujussuarsimavagut, taama Maliina Abelsen oqaluttuarpoq.

2010-mi aningaasartuutinut naatsersuutit maanna naatsersueqqissaanissamik ataatsimiitsitaliamut maanna nassiunneqarsimalerput ukiakkullu inatsisartut ataatsimiinnerisa nalaani isumaliuutersuutissartik ataatsimiititaliap saqqummiussiumaarlugu.

Powered by Labrador CMS