Aviisit Islandimi naqittalissasut
Aviisinik naqiterinermut Naqitat akigitani appartinngippagit Sermitsiaq.AG-ip aviisiutini Islandimi naqitertittalissavai
- Nutaarsiassaqartitsivimmi Sermitsiaq.AG-mi siulersuisut ullumi aalajangerput, Sermitsiap aamma Atugagdliutit naqiterneqartarnerannut Naqitat akigititaat nunani allani akinut sanilliunneqarsinnaasunngorlugu appartinneqanngipat, piaarnerpaamik aviisit Islandimi naqiterneqartalissasut. Tamatumunnga pissutaavoq, aviisit Islandimi naqiterneqartalernerisigut nutaarsiassaqartitsiviup annertuumik sipaaruteeqarsinnaanera. Sipaarutissat naatsorsorneqarput, Islandip Kalaallit Nunaatalu akornanni assartuinermut akigititat ilanngutereerlugit, nutaarsiassaqartitsiviup pisortaa Poul Krarup taama tusagassiutinut allappoq.
Nutaarsiassaqartitsiviup Sermitsiaq.AG-p sipaartariaqalerneranut pissutaavoq, pisortat kalaallit aviisiini allagarsiisarnerat annikillineqarujussuarmat.