Angallatinut Naalaganngorniartut Ilinniarfiat nunatsinniiginnassaaq

Aggustip aallaqqataata kingorna Kalaallit Nunaanni Umiartornermik Ilinniarfimmi angallatini naalaganngorniarnermik ilinniarfik nunatsinniiginnassaaq, Paamiuniikkunnaassaarli, ilinniarfik Nuummut Sisimiunulluunniit nuunneqassammat.

Inatsisartut 2011-mut aningaasanut inatsit novembarimi akuersissutigaat, tassuunakkut Paamiuni Umiartornermik Ilinniarfik 9.296.000 koruuninik aningaasaliiffigineqarluni, tamannali peqatigalugu oqaasertalerlugu ukioq atuarfiusumit 2011/12-imit ilinniarfik angallatini naalaganngornianik tiguseqqissanngitsoq, taamatut ilinniagaqarneq Danmarkimut nuunneqassammat.

Suleqatigiissitalli, ilaatigut aalisartut piniartullu kattuffiannit KNAPK-mut, nunatta umiarsuaatileqatigiiffianit Royal Arctic Linemit, Kalaallit Nunaanni Sulisitsisut Peqatigiiffiannit aamma Royal Greenlandimit ilaasortaaffigineqartup, inassutigaa ilinniagaqarfik taanna nunatsinni attatiinnarneqassasoq, taannali Paamiunit Nuummut imaluunniit Sisimiunut nuunneqassasoq.

Taamaattumik naalakkersuisut Aningaasanut Ataatsimiititaliaq 1,2 millioner koruuninik qinnuteqarfigaat, nunatsinni angallatini naalaganngorniarluni ilinniarnerup 2011-p sinnerani ingerlatiinnarnissaanut.

Aningaasanut Ataatsimiititaliaq akuersissappat angallatini naalaganngorniarluni ilinniagaqarneq aggustip aallaqqaataanit nanginneqassaaq, Aningaasanulli Ataatsimiititaliaq aningaasaliissuteqannginnermini naalakkersuisunut 11-nik apeqquteqarsimavoq.

Aalisarnermi siunissaq?
Angallatini naalaganngorniarluni ilinniarfiup nunatsinnit Danmarkimut nuunneqarnissaanik pilersaarutinut ilaatigut tunuliaqutaavoq ilinniagaqarniarlutik qinnuteqartartut ikittorujussuusarnerat, suleqatigiissitaliallu ersissutigaa inuusuttorpassuit angallatini naalaganngorniarnermik ilinniagaqarneq tunulliutissagaat, pissutigalugu aalisartutut siunissaqarnissaq nalorninartutut isigineqarmat. Inatsisartut ukiakkut ataatsimiinneranni aalisarnermut naalakkersuisoq Ane Hansen, Inuit Ataqatigiit, sinerissamut qanittumi aalisarnerup naleqqussarnissaanik imalimmik aalisarnermut inatsimmik saqqummiussissaaq. Kutterit aserfallassimasut 32-it angallatinik raajarniutinik nutaalianik arfinilinnik, immaqa arfineq-marlunnik, taarserneqassapput, akerlianilli uuliasiorneq aatsitassarsiornerlu imaani atorfinnik nutaanik amerlanerusunik pilersitsissapput.

Aningaasanut Ataatsimiititaliap angallatini naalakkanik siunissami qanoq pisariaqartitsitigisoqarnera paaserusuppaa, suleqatigiissitalialli pilersinneqarsimasup ullumikkut tamatumani ineriartorneq ernumanartoqartittorujussooreerpaa: - Aatsitassiulernissamik uuliasiulernissamillu qularnaatsumik isertitaqarfiusussatut naatsorsuutigineqarneranik qitiusumit nalunaaruteqarnerit takutitsipput aalisarnermik inuussutissarsiuteqarnissaq isigineqartoq inuussutissarsiutitut pingaartinneqanngitsutut.

Suleqatigiissitaliaq isumaqarpoq Paamiuni tunngaviusumik ilinniagaqarnerit iluatsilluannginnerannut aamma pissutaasoq kollegiat pitsaanngitsut ullutsinnullu naleqqutinngitsut, ilinniarfiullu alianartumik qungujuttussanngortitsilluni blokkit kollegiaatini ateqartippai Sibieria, Alaska, Canada aamma Ørneborgen. Aningaasanulli Ataatsimiititaliap tikkuarpaa Nuummi Sisimiunilu kollegiani inissaqarniarneq tatineqartorujussuusoq, ataatsimiititaliallu paaserusuppaa angallatini naalagaangorniarfiup Paamiunit Nuummut Sisimiunulluunniit nuunneqarnera illoqarfinni taakkunani marlunni kollegiassaaleqinerujussuarmut qanoq isilluni ataqatigiinnersoq.