Igutsappassuit Københavnimut

Ulluni makkunani københavnermiut nutaat 3 millionit sumiiffinnut nuimasuunut, soorlu Kongens Nytorvimut nutserarput, Politiken tallimanngormat allappoq.
Tassaanngilaq ilaqutariinnik annertuumik katersortitsineq imaluunniit akademikerinik qaffasissunik ilinniagalinnik tikerartitsineq, tassaallutilli igutsaat honningiliortartut Lollandimeersut. Igutsaap illoqarfiit pingaarnersaanni illoqannginnersat uumassuseqartissavaat, avatangiisit allanngoraluartut pinngortitarlu akuutissanik serpalittarfigineqarsimagaluartoq.
Tamanna peqatigalugu nektarimik, illoqarfimmiut altankarsiannit, kaajallattarfinnit parkeqarfinnillu katersukkaminnik honningiliussapput, Politiken allappoq.
- Ullumikkut illoqarfimmiorpassuit eqqarsartarput pinngortitaq uagutsinnit ulluinnatsinnillu ungasissorujussuarmiittoq.
- Illoqarfimmili pinngortitaqarpoq assigiinngisitaartorujussuarmik, qimuttuitsut ingerlaarfiisa akornini, baggårdini parkinilu, igutsaat pinngortitaq attatiinnarlugulu pujoralatsertarsinnaallugu, antropolog Oliver Maxwell oqarpoq.
Taanna suliniummi Bybi isumassarsisuuvoq pisortaallunilu, oqarluartaat "Illoqarfik uumassuseqalersipparput" atorlugu københavnermiut ulluinnaanni igutsannik utertitseqqinniartoq.
Suliniut taamaattoq ukiuni arlalinni illoqarfinni soorlu Parisimi, Londonimi Chicagomilu atorneqareersimavoq, tamakkunani illut qaliaanni igutsaateqarfiit nassaassaallutik.
Taanna taaneqartarpoq "urban farming", periuserlu taanna atorlugu illoqarfimmi igutsaat ilaatigut Kongens Nytorvimut, Bella Centerimut Carlsbergimullu nuutsinneqarput Københavnillu qulaani silaannarmut siaruaatissallutik.
Tamanna peqatigalugu isumaginninnikkut aningaasarsiornermik taaneqartumik suliniutaapput, angerlarsimaffeqanngitsunik, atornerluisunik inunnillu tarnikkut ajornartorsiutilinnik igutsaateqartutut nutaanik ilinniartitsissutaassallutik.
Taamaattumik Amagerimi Aktivitetscenter Sundholmimik atuisut igutsannik passussinermik ilinniartinneqarput, Politiken allappoq.