Eqqakkanik atomitalinnik pingitsaaliissummik toqqorsivingorsinnaapput
Kommunit arlaannaalluunniit Risø-miit eqqakkanik atomitalinnik tiguserusunngillat - immaqali pinngitsaalineqarsinnaapput
Bornholm, Lolland, Skive imaluunniit Kerteminde, Danmarkimi Kalaallit Nunaannilu nunap sananeqaataanik misissuisartut (GEUS) Risø-miit eqqakkanik atomitalinnik 6.000 kubikmeterisut annertutigisunik inissiivigineqarsinnaasutut toqqarneqaaraluarlutik, eqqakkanik atomitalinnik tiguserusunngillat.
Eqqakkat atomitallit peqqinnissaq isumannaallisaanissarluunniit eqqarsaatigalugit ulorianaateqanngingajattut, immikkut ilisimasallit nalunaaruteqaraluartut kommunit tiguserusunngillat. Eqqakkat atomitallit illoqarfinni takornariaqarnerup inuussutissarsiutillu ineriartortsinnissaannut akornutaasinnaanerat aarleqqutigineqarpoq, soorlu Skive Kommunimut, tassanimi eqqakkanut inissiivigineqarsinnaasut nunaminertat marluk toqqarneqarsimapput, taamatut Berlingskemi allaaserinnittoqarpoq.
- Isumaqanngikkaluarama inuutillunga taamatut misigisaqassaganngikkaluarama. Kommunitsinni nunaminertat marluk eqqakkanik inissiivissatut piukkunneqartut paasitinneqarama isumaqaraluarpunga illaruaatissaannartut nalunaarfigineqarlunga. Maani ineriartortitsiniarnitsinnut tamanna sunniuteqapilussaqaaq.
- Takornariaqarnermik maani suliaqarnitsinnut sunniinerlussaaq, imaassinnaallunilu suliariniakkatsinnut aningaasaleerusussinaasut nangaalersut, Skive Kommunimi borgmesteri, Flemming Eskildsen (V) oqarpoq.
Nunamut namminermut Peqqissutsimullu ministereqarfimmiit nalunaarput, kommunit eqqartorneqartut misissueqqittoqareerluni naliliiniarnermi peqataatinneqarumaartut, ukiullu ataatsip ingerlanerani nunaminertat piukkunneqartut marluinanngunngikkunik pingasuinnanngorsimassasut. Kommunit toqqarneqarsimasut tamarmik inissiivigineqarusunngilluinnaraluartut, ministereqarfik GEUS-ilu kommunimut sorlermut inissiinissaq aalajangerpassuk assortorneqarsinnaassanngillat.
Aalbogrgip Universitetiani Naalagaafiit ingerlanneqarnerannut ilisimatooq, Henning Jørgensen, oqarpoq.