Maajip aallaqqaataani Siumup oqaaseqaataa

Inuiaqatigiit suliffissaqarluartut aammalu suliffissaaleqinerup akiorniarnerani erseqqissumik politikkeqarlutik anguniagaqartut sulisartunut atugarissaarnerulersitsisarput, Aleqa Hammond oqarpoq.

Ukiuni marluk ingerlanerinnaani nunatsinni suliffissaaleqineq 3,4 %-iinnarminngaanniit maanna qaffariapiloorpoq, illoqarfiit ilaanni allaat marloriaatinngorsimalluni.

Inuuniarnerup oqimaannerulernera assersuutitigut arlaariinnit assersuusiorfigineqarsinnaagaluartoq maannakut marluinnaat taassuakka.

Piffissami ukiut marluk ingerlanerinnaani inuuniarneq akitsupiloorpoq, tassa orsussamut akitsuutip atuutilersinneqarneranit kiassarniarneq akitsorpoq, qularutigineqassanngilarput tamanna assigiinngitsutigut assartuussinikkut akitsuinermik kinguneqarluni pisiassat suli akisunerulernissaannik kinguneqassasoq.

Aningaasap pisissutaasinnaanera appariaqaaq tamannalu akitsuusersuinerit arlaannaatigulluunniit ilorraap tungaanut saatitsinngilaq. Taamaattoq naalakkersuisooqatigiit isumaqatigiissutigaat orsussamunngooq akitsuusiineq isumassarsiatsialaasoq. Siumumi tamanna aqqutissaasutut isiginngilarput isumaqaratta inuniarnerup sulisartuusunut oqinnerulersitsisinnaasunik aqqutissiuussinissaq pingaarnerusoq.

Suliffiissaaleqinerup qaangerniarnerani aalisartut tunitsivissaqarsinnaanerat pisassaqartinneqarnissaallu pingaarluinnartuuvoq, ilami amerlasuutigut sulisartuusut fabrikkini sulillutillu napatitsisuummata.

Siumumi isumaqarpugut aalisarnikkut pisassiissutit qaffassanngikkaanni naalakkersuinikkut pisussaaffigisariaqaripput aalisakkap tunineqartussap kiilumut tunitsivinnut tuninerani minnerpaaffiliisoqartariaqartoq. Minnerpaaffiliinikkut qulakkiissuarput aalisartup inuuniarnissaminut atugassaatigut akuerineqarsinnaasumik minnerpaaffiliineq. Minnerpaaffiliinikkut qulakkiissuarput tunitsiviit akinik aalaakkaasunik atugassaqartitsinermikkut aalajaannerusumik ingerlatsisinnaalernerinik. Minnerpaaffiliinikkut qulakkiissuarput nungusaataanngitsumik aalisarneq aamma sulisartunut aalisartunullu nungusaataanngitsumik atugassaqartisineq. Minnerpaaffiliinikkut nunatta akitigut nammassinnaasumik aammalu tamat peqataaffigisaannik atugassaqartitsilluta.

Siumumi isumarput malillugu sulisartut akissarsiaasa isumaqatiginnninniuteqarnikkut akunnermut akissarsiaritinneqartussat anguniarneqartartoq taassaasoq pitsaasumik sulineq tassami qulakkeerneqassammat inuussutigisineqarsinnaasumik sulinissaq.

Tamanna aamma aalisartup pisami kiilumut akitigitinneqartussap isumaqatigiinniutigalugu minnerpaaffilerneqarneratigut aalisartoq allatuulli pingaartinneqarluni isertitassaata kiilumut ammut appasinnerpaaffilerneqarneratigut inuussutigineqarsinnaasumik sulisoqarsinnaalissaaq.

Nungusaataanngitsumik ineriartortitsinissaq oqaluuserineqartillugu eqqaamaneqartariaqarpoq suliffissat nungusarnagit killormuanik tamat peqataaffigisinnaasaanik imminullu nammassinnaasumik ataqatigiittumillu aqqutissamik nassaarnissaq sulinissarlu. Pisuussutit uumassusillit uumaatsullu pineqartillugu nungusaataanngitsumik oqaluttoqartillugu isumaqarpunga naalakkersuinikkut ingerlatsinermi sulisartut aammalu innuttaasut aamma nungusaataanngitsumik ineriartortinneqarnissaat aqqutissiuunneqarnissaallu mininneqartartoq.

Ukiut arlerput maanna suliffissarpassuit takkutileraluttuartoq oqaluuseralugit. Suliffissaaleqisut maanna tamanna apeqqutigisalerpaat ila qaquguuna taakku suliffissarpassuit eqqartorneqaannartut pilersinneqarniartut. Inuiaqatigiit inigisaminnut akissaaruttut, aningaasalersugassaminnut akissaaruttut aammalu inuuniarneq oqittorsiorfiunngeqisoq qaqugu pitsaanerulissanersoq apersuutigisalerpaat. Ilanngulluta Siumumit naalakkersuisut aperiumavagut qaquguuna suliffissaaqineq akiorniarlugu sullittoqalerniarnersoq.

Inuiaqatigiit atugarissaarnerulernissaannunngooq innersuussisussanik ataatsimiititaliarsualiortoqarpoq, taakkulu sulereerlutik saqqummiuppaat siunissami pisortanit ikiorsiissutinik pisartagaqartut aammalu ikiorserneqarsimasut utimut akilersuisalissasut. Qularutigineqassanngilaq tamanna sulisartukkormiunut piffissap ilaanni suliffissaaleqilernerup nalaani ikiorserneqartariaqassangunik aammalu inuuniarnermikkut immikkut akissaqannginnerup kinguneranik ikiorserneqartariaqalersut eqqorneqassapput. Akiitsoqalereersimasut suli pisortanut akiitsoqarnerulernisssaat avaqqunneqarsinnaanngilaq.

Tamanna akuerinngeqaarput. Akuerinngeqaarput sulisartukkormiunut atugarissaarnerulersitsinissamik aqqutissiuussinngimmat. Taava aperisariaqalerpugut kikkunuku taava atugarissaarnerulissasut?

Siumumi suleqqissaagut suliffissaaleqinerup kingumut appasinnerpaaffianut nungutivinneqarnissaatalu tungaanut. Aatsitassarsiornerup periarfissiissutai isumatusaartumik avatangiisinut aammalu peqqissutsikkut ataqqinnilluta atorluarnerisigut tamatta suliffissaqartinneqarlutalu aningaasarsiornikkut atugarissaarnerulernerup kingunerissammagu inuuniarnerup oqinnerulernera, Aleqa Hammond oqarpoq.