Nunarsuatsinni politiit akisussaaffiat isorartunerpaaq TV3+-imi
TV3+-imi TV-kkut aallakaatitassiortut Nuummi politiit sulineranni malittarisimavaat. Immikkoortut siullersaat unnugu aallakaatinneqassaaq
Aallakaatitassiat nangeqattaartut politeeqarfinni sulinernik malinnaalluni aallakaatitassiaq TV3+-imi aallakaatittarneranni, maanna Nuummi politeeqarfimmi - nunarsuatsinni politiit akisussaaffeqarfiisa isorartunersaanni - sulinermit immiussat aallakaatinneqaqattaalerput.
Pisoqartillugu politiit orniguttut siuttuat Carl, islandimiut timmisartuutaat minnerliorsimammat sukkanerpaamik timmisartoqrfiliartariaqarpoq. Ajutoorneq qanoq annertutiginersoq aallaavigalugu qanoq iliuuseqarnissaq Carl-ip akisussaaffigaa. Politeeq qallunaaq, Michael, Nuummi inissinneqarsimasoq qaaqquneqarpoq, imerniartarfimmi arnap niviarsiaraq ukiukitsoq saassussimammagu orniguteqqullugu. Kiisalu Olava oqarfigineqarsimavoq, inissiat arlaanniit hash-imik tuniniaasoqarnerarlugu, ornigukkamilu najugaqartumit kamaqisumit ammaanneqarpoq. Politeeqarfimmi sulineq, politiillu suliaat naapitaallu unammillernartut qanimut isiginnaakkit, ontv-mi taamatut allaaserinnipput.