Ilulissat
Niviarsiaraq pingasunik ukiulik qimmimit upanneqartoq
Sapaatip-akunnerata ingerlanerani niviarsiaraq pingasunik ukiulik Ilulissani upanneqareersorlu, Qaasuitsup Kommunia aamma politiit takornariat innuttaasullu qimminut qimuttunut qanillivallaaqqunagit mianersoqquaat
Ilulissani niviarsiaraq pingasunik ukiulik uani sapaatip-akunnerani qimmmit qimuttumit upanneqarpoq.
Niviarsiaraq napparsimmaviliaanneqarpoq, tassanilu kiitinneri arlaqartut passunneqarlutik nakorsarneqarput.
Taanna qujanartumik inuunermik ulorianartorsiutaanngitsunik ajoqusersimasoq, Qaasuitsumi politiit ilisimatitsipput, kisianni niaqqumigut uluamigullu kilersimavoq, sakiamigullu tilluusarluni.
Qimmeq pitoqqasoq
- Tamatuma kingorna arnaq politiinut saaffiginnippoq, oqaluttuarporlu upassineq unitsissimallugu, qimmip upassinera Ilulissani Qoororsuup kollegiap eqqaani pisimavoq. Qimmeq upassinermini pitoqqavoq, Qassuitsumi Politiit pisortaat, Preben Westh, tusagassiuutinut nalunaarummi allappoq.
Politiillu paasiniaanerisa takutippaat, qimmeq pisup nalaani pitoqqasimasoq. Qimmerli pisut pissutigalugit kingorna toqunneqarpoq, qimminut qimuttunut inatsisit naapertorlugit.
Qanillattorasi
Taamaattumik qimminut qimuttunut qanillattortannginnissaq politiit eqqaamaqquaat.
- Qaammatini makkunani maanna Ilulissani takornariaqartipilussuuvugut, qimmillu maanna aamma piaraqarput, meeqqat qimminut qanillivallaartarnerisa saniatigut aamma inersimasut, ingammik tikeraat, qimmit ulorianarsinnaanerinik maluginiaanngitsoortarput, Preben Westh erseqqissaavoq.
Ulorianarsinnaasoq
Taanna Qaasuitsup Kommuniani bormesterimit Ole Dorphimit taperserneqarpoq, taanna takornarianut innuttaasunullu mianersoqqussummik nassiusseqataasuuvoq.
Immikkoortumik pisortap oqaatigaa, mianersoqqusineq Ilulissanut kisimi tunnganngitsoq.
- Tassani aamma qimmiaqqat takullugit attulaarniarneqartarneri pineqarpoq. Qimmiaqqat anaanaat eqqaaniikkajuttarpoq, taamatullu pisariaqartillugu illersuisarluni, Preben Westh oqarpoq.
Atuaruk: Qimmit qimuttut pigiinnarniarlugit ilungersorput