Monday, October 30, 2017 - 12:55

Niviarsiaraq inuusuttuaraq toqungasoq toraarneqarpoq - politiit ikioqqupput

Assi.: Leiff Josefsen
Niviarsiaraq inuusuttuaraq toqungasoq Nanortaliup umiarsualiviani arfininngornermi ualisoq toraarneqarpoq. Pisoq politiit toqutsisimanertut paasiniaaffigaat.

Paasiniaanermut atatillugu Nanortalimmi politiit innuttaasut ikiortiseraat.

Takunnissimasunik ujartuineq

Takunnissimasut, tallimanngornermi oktobarip 27-ani nalunaaqutaq unnuakkut ataatsip missaaniit arfininngornermi oktobarip ulluisa 28-ani ullaakkut nalunaaqutaq qulingiluat tungaanut takunnissimasinnaasut tusaasaqarsimasinnaasulluunniit, qinnuigineqarput politiinut saaffiginneqqullugit.

- Politiit pingaartumik innuttaasunit, aqquserngit Lundip Aqqutaa, Qujanarteq Mathiessenillu Aqqutaani takunnissimasinnaasunik tusaasaqarsimasinnaasunilluunnniit attaveqarfigineqarusupput, politiit tusagassiuutinut nalunaarummi paasissutissiipput.

Aammattaaq Nanortalimmi politiit innuttaasunit umiarsualiviup eqqaani videomik nakkutiginnilluni immiussanik peqarsinnaasunik aamma attaveqarfigineqarusupput.

- Toqutsisimanertut paasiniaaffigaarput, politikommissær Jack Nathansen, Sermitsiaq.AG'mut oqarpoq. Pasinartumik toqusoqarsimatillugu, ilumut toqutsisoqarsimanersoq politiit tamatigorluinnaq inerniuliussaqarniarlutik paasiniaanermik aallartitsisarput, politiit oqaatigaat.

Toqungasut timaannik misissuisartoq teknikerilu aggersarneqartut

Taanna paasissutissiivooq, toqungasut timaannik misissuisartumik Københavnimiit politiillu teknikerii allat marluk Danmarkiminngaanneersut aggersarneqarsimasut. Ikiuiartortut najukkami politiinut ikiuutaassaapput, taakku paasiniassavaat ilumut niviarsiaraq inuusuttoq pinerluffigineqarluni toqutaasimanersoq.

Umiarsualiviup eqqaa assiaqutsersorneqarsimavoq, tassungalu tunngatillugu politiit innuttaasut qinnuigaat assiaqusiineq ataqqeqqullugu.

Seneste nyheder / Nutaarsiassat kingulliit