atuakkiortoq

Niviaq Korneliussen 75.000 koruuninik nersornaaserneqarpoq

Atuakkakkiortut tallimat tamarmik assigiinngitsunik sunniuteqarsimasut Statens Kunstfonds Legatudvalg for Litteraturimit nersornaaserneqarput.

Niviaq Korneliussen

Niviaq Korneliussen piginnaaneqarluartuuvoq.

Atuagaq saqqummersitaa nersorniarneqaqqippoq. Statens Kunstfonds Legatudvalg for Litteraturip 24-nik ukiulik Niviaq Korneliussenip 75.000 koruuninik nersorniarlugu tunivaa. Niviaq Korneliussenip atuagaq ‘Homo sapienne' saqqummerseqqammerpaa, Danmarkimi atuakkani 2014-ip ukiaanerani pikkunarnerpaat tallimat ilaanniittutut toqqarneqarluni.

Atuakkiortut tallimat danskit atuakkiortarneranut assigiinngitsunik sunniuteqarsimasut Statens Kunstfonds Legatudvalg for Litteraturimit nersornaaserneqarput.

‘Homo sapienne' pillugu ima oqaaseqaateqartoqarpoq:

- Atuagaq ‘Homo sapienne' atuakkanit allanit sanilliullugu allaaneruvoq. Atuakkami inuusuttuuneq, atoqatigiinneq, kinaassuseq kulturilu eqqartorneqarput. Aamma atuagaq suiaareeqatigiinnoortuuvoq. Atuakkap aqqa aamma oqaatsinik piginnaaneqartoqarneranik ersiutaavoq. Atuagaq inersimasunut tulluartuuvoq. Universitetimi atuarneq atuakkami eqqartorneqarpoq, illoqarfissuarmi pisuulluni. Naalagaaffeqatigiinnermi soqutiginartumik Kalaallit Nunaannit aatsaat atuakkiortoqarpoq, naak atuakkami kalaaliussuseq eqqartorneqarpianngikkaluartoq.'

Jakob Martin Strid, Niels Lyngsø, Madame Nielsen aamma nipilersortartut Malk de Koijn 75.000 koruuninik nersornaaserneqarput.

Niviaq Korneliussen Nanortalimmiuuvoq, atuakkiaminullu Nunat Avannarliit Siunnersuisooqatigiivisa atuakkiortunut nersornaasiuttagaanut nersornaaserneqartussatut innersuunneqarluni. Taanna Reykjavikimi septembarip 27-ani tunniunneqassaaq.

Powered by Labrador CMS