Nivi Olsenip ilinniarnertuunngorniarfiit nersorniarpai - karakterit apeqqutaatinnagit

Ilisimaneqareersutut kalaallit ilinniarsimanerisa qaffasissusaat ataatsimut isigalugu naammaginanngilaq.

Kisianni inuusuttut amerlanerit ilinnigaqarnissaasa nunatsinnut qanoq pingaaruteqassusia taamaalillunilu inuusuttut ilinniarnerminnik ingerlatsiinnarnissaasa naammassinninnissaasalu pingaaruteqassusiat ataqqillugit, ilinniarnertuunngorniarfiit immikkoortuni marlunni suliniuteqarnerisa malunnartinneqarnissaa ilinniartitaanermut, kultureqarnermut, ilisimatusarnermut ilageeqarnermullu naalakkersuisup, Nivi Olsenip, 'Ilinniartunik amerlanernik takkutsitsisarneq' aamma Ilinniartunik amerlanernik naammassinnitsitsineq' nersornaasiissutigineqartassasut kissaatigaa.

Taamaammat Olsenip ilinniarnertuunngorniarfiit taakkunani marlunni pitsaanerpaamik angusaqartut ukiut tamaasa nersornaasertarniarpai.

Nersornaasiissutit tamarmik GUX Nuummut
- GUX Nuuk, KTI-p ilinniarnertuunngorniarfia unammillertigalugu, ilinniarnertuunngorniarfittut ilinniartut ulluinnarni ilinniartitsinermut takkuttarnissaannik kajumissaasarnermi kaammattuisarnermilu pitsaanerpaamik ukioq 2015 sinaakkusiisimasutut nalilerneqarluni nersornaammik 'Ilinniartunik amerlanernik takkutsitsisarneq' tunineqarpoq, Nivi Olsen tusagassiuutinut nalunaarummini nassuiaavoq.

- GUX Nuuk, uani Campus Kujallep ilinniarnertuunngorniarfia unammillertigalugu, nersornaammik 'Ilinniartunik amerlanernik naammassinnitsitsineq' aamma tunineqarpoq. Ilinniarnertuunngorniarfik ilinniarnertuunngorniarfimmi ilinniartunik amerlanerpaanik naammassinnitsitsisoq nersornaaserneqarpoq.

GUX-mi ilinniarnertuunngortut siullerpaat
Ukioq manna ilinniarnertuunngortut GUX-imi ilinniartutut siullertut imminnut taasinnaapput. 2012-imi ilinniarnertuunngorniarfimmik aaqqissusseqqinnerup kinguneranik taaguutigaa Ilinniarnertuunngorniarfik, pingaarnertullu siunertaalluni ilinniartut amerlanerit pitsaanerusumik ilinniagaqartinniarlugit ilinniartitaanerup ineriartortinneqarnerata qulakkeerneqarnissaa.