oqallinneq
Nivi Olsen: Perorsaasut tikisitat nunaqavissullu assigiimmik atugaqassapput
Kommuneqarfik Sermersuup perorsaasunik tikisitsinissamik siunnersuuteqarnera oqallisigineqangaatsiarpoq.
Marlunngormat Kommuneqarfik Sermersuumi meeqqanut atuarfeqarfinnullu ataatsimiititaliami siulittaasoq, Nivi Olsen (D) KNR-imut oqaluttuarpoq, perorsaasunik amigaateqarneq Danmarkimiit tikisitsinikkut eqqarsaatersuutigineqartoq.
Kingornalu oqallisigineqangaatsialerluni. Siumup kommunalbestyrelsimi ilaasortaatitaa, Peter Davidsen Facebookimini allaaseraa perorsaasut tikisitat qallunaat isumaqatigiissutaat malillugu atorfinitsinneqartassasut, taamaalillutillu akissarsiaqqortunerussallutik. Aammattaaq oqaatigaa perorsaasut tikisitat nunaqavissunut sanilliukkaanni taakku atorfimmut atatillugu inissaqartinneqartassasut.
Ilimagisarlu siulleq ilumoorpasinngilaq. Perorsaasut kommunini atorfeqartut tamarmik isumaqatigiissut naapertorlugu atorfeqarput.
Tamannalu perorsaasunik Danmarkimiit tikisinniarnerini ajornakusoortitsisinnaavoq, tassanimi qaffasinnerusunik akissarsiaqarsinnaangamik.
Atorfimmullu atatillugu inissat pineqartillugit, taamaannerangaaneq, Nivi Olsenip (D) ilumuunnginnerarpaa.
- Ukiuni kingullerni marlunni meeqqerivinni sulisunut inissianik 50-inik tunniussisimavugut. Ataasiaannarluni tikisitamut sulisumut inissamik tunisisoqarsimavoq, taanna tusagassiuutinut nalunaarummi allappoq.
Meeqqanut atuarfeqarfinnullu ataatsimiititaliami ataatsimiinnermi saqqummiussami erserpoq atorfinnik inuttassarsiuussinerni inissamik neqerooruteqartarsimangaluartut, taamaattoq perorsaasutut atorfiit amigaatigineqartut 52-it inuttalerneqarniarneri iluatsitsiffiusimanani.
Ataani Peter Davidsenip Facebookimi allagaa takusinnaavat: