§37-apeqqutit
Nivi Olsen: Nipangersimasussaatitaaneq marloriaammik sumiginnaalersitsisinnaavoq
Sulliviit assigiinngitsut paasissutissanik paarlaasseqatigiissinnaasariaqartut, Demokraatit Inatsisartunut ilaasortaatitaat Nivi Olsen isumaqarpoq. Taamaammat nipangersimasussaatitaaneq pillugu Naalakkersuisunut paragraf 37 naapertorlugu apeqquteqarpoq
Demokraatit Inatsisartunut ilaasortaatitaat Nivi Olsen, suliffeqarfiit oqaloqatigiissinnaanatillu paasissutissanik paarlaasseqatigiissinnaannginnerisigut inuiaqatigiit meeqqanik marloriaammik sumiginnaalersinnaammata, nipangersimasussaatitaanermut maleruaqqusat Naalakkersuisunit oqilisaaffigineqarniarnersut, paragraf 37 naapertorlugu apeqquteqarpoq.
Nivi Olsenip apeqqutini ilaatigut ima tunngavilersorpaa:
- Klasselæreri pasitsassimaguni meeraq sumiginnarneqartoq taamaattumillu kommunimut nalunaaruteqartariaqarluni taava klasselæreri malittaanik tusartinneqarsinnaanngilaq suliaq qanoq ingerlanneqarnersoq, susoqarsimanersoq aamma ilinniartitsisup sumiginnaasoqarsimaneranut pasitsaassaqarsimanera tunngavissaqarnersoq.
Nangipporli:
- Allatut oqaatigalugu klasselærerip atuarfiullu nalornisinneqalersarput ilumut kommunip meeraq
ikiorniarlugu aallartissimanersoq. Tamatumunnga pissutaavoq nipangersimasussaatitaanermut
malittarisassat.
Aamma atuaruk: - Kinguaassiutitigut atornerluisarneq oqaluuserineqarnerusariaqarpoq
Sulliviit akornanni paasissutissanik paarlaasseqatigiinneq
Taamaammat Nivi Olsenip Naalakkersuisunut apeqquteqarpoq, Naalakkersuisut nipangersimasussaatitaanermut inatsisip allanngortinnissaa suliniutigerusunneraat, taamaasiornikkummi meeqqanik inuussuttunulli sumiginnarneqarsimasut pillugit suliani pisortat suliffeqarfiutaat paasissutissanik paarlaasseqatigiissinnaanerat inerteqqutaajunnaassammat.
- Taamaattoqassanngippat kissaatigaara tunngavilersorluarneqassasoq inatsit sooq allanngortikkusunneqannginnersoq, Nivi Olsen paragraf 37 naapertorlugu apeqquteqaammi piumasaqarpoq.
Malittarisassat atuuttut allanngortinnagit attatiinnarneqarnerisigut meeqqap pisariaqartitaanik illersuinerussasoq, Naalakkersuisut qanoq isumaqarnersut, Nivi Olsenip ilanngullugu tusarusuppaa.
- Uangali isumaga naapertorlugu ajornartorsiutit annersaraat meeqqap marloriaammik sumiginnarneqalersinnaanera, sulliviit oqaloqatigiissinnaatitaanngimmata paasissutissanillu paarlaasseqatigiissinnaanngimmata, Nivi Olsen tunngavilersuivoq.
Video: Meeqqap atornerlugaasimanini oqaluttuarippagu tusarnaarit misiginneqataallutillu