Thursday, November 9, 2017 - 15:39

Nivi Olsen: Aalisarnermut inatsit kinguartinneqarli

- Suliarillluakkamik siunnersuummik misissuinernik pitsaasunik naatsorsuutinillu tunngavilimmik saqqummiussisinnaanngikkussi, taava siunnersuut Inatsisartut ukiup tullianut upernaakkut ataatsimiinnissamut kinguartinneqartariaqarpoq, Demokraatininngaanneersoq Nivi Olsen oqarpoq
Assi.: Leiff Josefsen
Inatsisartuni ilaasortaq Nivi Olsen (D) aalisarnermut inatsit ukiup tulliani upernaakkut ataatsimiinnissamut kinguarteqqullugu Naalakkersuisunut kaammattuuteqarpoq

- Suliarillluakkamik siunnersuummik misissuinernik pitsaasunik naatsorsuutinillu tunngavilimmik saqqummiussisinnaanngikkussi, taava siunnersuut ukiup tullianut upernaakkut ataatsimiinnissamut kinguarteriarsiuk.

Taama kaammattuuteqarpoq Inatsisartuni ilaasortaq Nivi Olsen (D), taanna ukioq manna Naalakkersuisut misissueqqissaarnissaannik naatsorsuusiornissaannillu kaammattuuteqarsimangaluarpoq, 

- Tamanna ajorluinnaqqissaarpoq. Siunnersuutip sularinissaanut sapaatip akunnerinnanngorpoq uangullu Inatsisartut piffissaqarluartariaqaraluarpugut inatsisip iserfiginissaanut isummerfigitinnagu. Periarfissaqartariaqarpugut sukumiisumik misissuinerit naatsorsuinerullu paaseqqissaarnissaannut, Demokraatit aalisarneq pilllugu oqaaseqartartua isornartorsiuivoq.

Nivi Olsenip oqaatigaa, Aalisarnermut Naalakkersuisoq Karl-Kristian Kruse (S) 'taamatut pissusilersornermikkut takutippaat ernummatigisariaqartumik kikkut tamat oqartussaaqataaneranni suleriutsinut ataqqinnissuseqaratik'.

- Aalisarnermut inatsit pingaarutilerujussuuvoq aamma taamaattumik iluaqutaanngilaq piffissaq kingullerpaarpaaq atorlugu siunnersuummik Inatsisartunut saqqummiussiniarneq, taanna tikkuaavoq.

- Naalakkersuisut qulequttap taama pingaaruteqartigisoq sapaatip-akunnerinngisaaniluunniit Inatsisartunut suliakkiussisimanera ileqqorissaarnerunngilaq, Nivi Olsen oqarpoq.

Seneste nyheder / Nutaarsiassat kingulliit