qineqqusaarneq
Nivi aalajangiusimavoq: Kollegianut 300 millionit immikkoortippakka
Nivi Olsenip sallunerarneqarnini ilumuunnginnerarpaa. Taanna kisitsisinik katiterialuni 300 millioninngortitsivoq.
Qineqqusaarneq aallartilluareerpoq, pisarnerlu malillugu sakkortuumik pasilliisoqartarpoq.
Pasilliisoq kingulleq tassaavoq, Nick Nielsen (IA), taassuma Nivi Nielsen (D) kollegianik sanaartortitsinissaq pillugu salluliornerarpaa.
Naalakkersuisuugallarami kollegianut anaartortitsinissamut 300 millionit koruuninik immikkoortitseqataasimalluni Ilisimatusarfimmi qinersisartunik ataatsimiititsinermi taanna oqarpoq.
Kisitsisit 2014-imit 2017-imut katillugit Nick Nielsen (IA) aningaasanut inatsimmi 69 millioniinnarnik nassaarpoq.
Atuaruk: IA-meersoq Nivi Olsenimut: Salluvutit
Ukiut missingersuuteqarfiusut Nivip ilanngukkai
Kisianni kisitsisit amerlanerujussuit katinneqartussaasut Nivi Olsen (D) oqarpoq.
2020 tikillugu aningaasanik immikkoortitseqataasimalluni taanna oqarpoq, kisitsisillu 2015-imi 2020-mut katinneqartussaanerarlugit.
Taamaalilluni 200 millionit koruunit anguai. Kisiani 2018-imit siumut kisitsisit ukiuni missingersuutaasuniinnerat maluginiagassaavoq, tassa aningaasanut inatsimmut akuerineqartumut ilaanngimmata. Ukiullu qinigaaffiusut qaangeqqavai.
Illuut isumaqatigiissuteqarfigineqarnerat
100 millionit kingulliit Illuut A/S-mik kollegiat 500-t tikkillugit illoqarfinni ilinniarfiusuni sananeqarnissaannut isumaqatigiissuteqaatigineqartut ilanngullugit Nivi Olsenip nassaarai, taakku Namminersorlutik Oqartussat attartornissaannut pisussaaffeqassapput.
Inissiat taakku 500-t minnerpaamik 100 milllionit koruuninik akeqassasut nalilerpaa.
- Kisianni aamma paasisinnaalluarpara paattuungasimappat paasiniaanermini, imaaliallaannangassaasimangunanngilarmi paasissallugu, Nivi Olsen (D) tusagassiuutinut nalunaarummi allappoq.