Nive: - Inuttaanissara neriuutigisimanngikkaluarpara

- Nuanneqaaq, Nive Nielsen oqarpoq illalaarlunilu.

Cafemi Københavnimiittumi naapeqatigiipput, tassani tv-kkut nangeqattaartuliami 'The Terror' inuttaaqataanini oqaluttuaraa.

Piffissaaleqinini pissutigalugu, inuttaaqataanissamut qinnuteqarniarluni eqqarsaatersuuteqarnini taamaateqqajaasimangaluarpaa.

E-mailimik nassitsisoq

Qaqutigoortumillu angerlarsimaffimminut Nuummut ukiakkut tikeraarnermini radioaviisikkut tusarsimavaa, isiginnaartitsisartumik inuit arnaataanik isiginnaartitsisinnaasumik ujaasisoqartoq.

- Angalaqqammerpunga qasusupilussuullungalu. Eqqarsaatigaaralu misiliinissannulluunniit piffissaqarnanga qasuvallaarama. Taamaammaat soqutiginngiinnarpara.

Qaammatillu missaa ingerlareertoq eqqumiitsuliortoq qasuersaalaatsiareertoq, kammalaataata inuttassarsiuneq pillugu Facebookimi takutippaa.

- Eqqarsalerpunga, immaqa angalanissama tullia pitinnagu angumerisinnaavara. E-mailimillu nassitsivunga.

Videokkut misiliisoq

Ingerlaannarlu akissuteqartoqarsimavoq, taannalu isiginnaartitsilluni misiliisoq takorusussimavaat. Taassumalu angalanerata nalaani pisussaasimavoq.

- Nuummi facetime atorlugu siullermik misiliivunga, sianeqqippullu uangalu Qaqortumukalerlunga tassanilu internettimut attaviat pitsaanerpaajunani, taamaammat tamaani Køvbenhavnimi misilitseqqippunga.

Misilitsinnerup tullia Hollandimi ingerlanneqarpoq, misilitsinnissanilu angumeriniarlugu tusarnaartitsinissani minutsini 30-ni kinguartittariaqarsimavaa. Tassanngaanniillu pimoorussisoqalerpoq: Misilitsinnerup tulliani nangeqattaartuliortut taanna naapikkusussimavaat.

Perusuersartarfimmi sungiusartoq

Nangeqattaartullu immiunneqarfissaanut Budapestiliarsinnaanersoq aperineqarpoq. Kisianni Nive nipilersoqatigisartagaalu unnuit tamarluinnangajaasa appisimaartarput unnuk ataaseq kisiat pinnagu, ullormi taanna Dresdenimiit Hamborgimut ullormi ataatsimi angumerisinnaasannginnamikku.

- Oqarfigaakku Dresdenimiit Budapestimut utimullu Hamborgimut timmisartortissinnaangussinga piffissaqarsinnaavunga, Nivi Nielsen unikaallalluni sivikitsumik illarpoq.

- Timmisartumiillunga eqqarsaatigaara akunnittarfimmukaqqaartinnaga misilitsikkiartoqussagaannga.

Nivemmi manuskripteq suli atuarsimanngilaa, taamaammat piareersimalluarumalluni timmisartup perusuersartarfiani isiginnaartitsissut sungiusarsimavaa. Taamaaliornera asuliinnaasimanngilaq, tikiinnartormi ingerlaannaq immiussisarfiliaassimavaat.

- Misilitsinnerpassuupput pitsaanerusumilluunniit iliornissannut piffissaqarsimananga.

Neriuuteqarnaveersaartoq

Naak ilimasukkaluarluni, angalanini ingerlateqqiinnarpaa, inuttaaqataalersinnaaninilu eqqarsaatiginaveersaarlugu.

- Neriuuteqarnaveersaarfigaara. Isumaqarpunga iluatsilluartoq. Kisianni neriuuteqarnaveersaarsimavunga, inuttaaqataassanngikkumami pakatsiinnaqinagama. Taamatullu misiliivunga ajunngilarlu.

- Kisianni aap, neriuuteqarluarsimavunga. Soorunami.

AAMMA ATUARUK: Ridley Scottip tv-mi nangeqattaartuliaani Nive Nielsen inuttaassaaq

Sooq ilinnut taamak isumaqartigaa?

- Isumaqarpunga nuannersupilussuusoq. Isiginnaartitsineq nuannareqaara, naak isiginnaartitsikulanngikkaluarlunga. Kisianni tamatigut isiginnaartitsisimatillunga nuannerlunilu pissaganartartoq isumaqarpunga. Kikkummi taama periarfissinneqartarpat.

Ulllualunnguillu qaangiunnerini e-mailimik allagarsivoq.

- Allaqqavoq, suli soqutiginnikkuit inuttaaqataasinnaavutit. Assut nuanneqaaq, tamanna angalanitta nalaani bussernitta nalaani pivoq.

Angalaneq naammassiinnartoq Nive Nielseni immiussinernut peqataajartorluni Budapestimut nuuppoq. Qanorlu ingerlasoqarsimanera aqagu tamaani Sermitsiaq.AG-mi atuarsinnaavat.