nipilersorneq
Nive Canadami angalasoq
Nive nipilersoqatigisartagaalu the Dear Children Canadami nipilersoqattaarput. Tassani saqqummersitassartik nipilersorlutik misilerarlugit. Nivep neriuutigaa ukioq manna nunatsinni tusarnaartitsisinnaassallutik
Nive Nielsenip nipilersoqatigisartakkani ilagalugit Canadami tusarnaartitseqattarpoq, tassani tulliani nuuteeraliassaminnik saqqummersitsilerunik nipilersuutigineqartussat atortarlugit. Nuuteeraq saqqummersitassaat USA-mi saqqummersinneqarumaarportaaq.
Nive Kamloops, Revelstoke, Kewlona & Penticton-imi British Columbiap eqqaaniittuni nipilersoqattaaqqammerpoq. Musqueam-imi ippassaq ullumilu Vancouverimi tusaamaneqarluartumi Rickshaw Theatre-rimi North Fest 2014-imi nipilersussalluni.
Taanna pereeriarpat Yukon-imut Southern Tutchone-mullu erinarsortartoq Diyet peqatigalugu nipilersussaaq. Martsip ingerlanerani California, Arizona, Texas, Georgia New York-ilu nipilersorfigissavai. Nivep neriuutigaa ukioq manna Kalaallit Nunaanni tusarnaartitsisinnaassalluni.