Niuernikkut isumaqatigiissut
Niuernikkut isumaqatigiissut nunatsinnit akisunaarneqarsinnaavoq
Europami Parlamentip Canadamut niuernikkut isumaqatigiissut ippassaq akuersisutigaat, isumaqatigiissutilli nunatta aalisakkanik avammut niuerutaanut sunniuteqarnerloriaannaavoq.
Canadamut CETA-mik isumaqatigiissut sivisuumik isumaqatiginninniassutigineqarsimasoq marsip aallaqqaataani atuutileriaasoq paasinarsivoq. Immussuarnik niuernerulernissaq nuannaarutigalugu, Nunalerinermik Inuussutissalerinermilu suliniaqatigiiffik taama isumaqarpoq.
Kalaallit Nunaata anigaasaqarnera ajorseriassaaq
Danskit immuerniat nuannaarutigeqisaat nunatsinni aalisakkanik inuussutissarsiutillit isumaqataanngillat, nunattami aalisakkanik avammut niuernikkut pingaarnertut iluanaarutiginerpaaffigisarmagu.
Inuussutissarsiornermut, Niuernermullu Naalakkersuisup Vittus Quajukitsup Inatsisartunut ilaasortap Justus Hansenip apeqquteqaanut december qaammataanni akissuteqaammini oqaatigaa, CETA-mik isumaqatigiissut " nunatta anigaasaqarnera ajorseriarsinnaasoq"
- Niunernikkut isumaqatigiissutip nunatsinnut qanoq anigaasatigut eqquinerlunnissaanik kisitsisiliisinnaanngikkallarpoq killilersugaanngitsumillu niueqatigiinnissamik isumaqatigiissutit Kalaallit Nunaata EU-mik attaveqarneratigut ilanngaaserinikkut immikkut salliutitaasarnera annertusiartortumik ajorseriartippaat, Vittus Quajukitsoq ilaatigut taama allappoq.
Canadamiunut iluaqutaassaaq
Nunatta avammut nioqqutigisartagai Canadap aamma tunisassiarisarpai, isumaqatigiissusiornerullu Europamut nunani tamalaani ajornannginnerusumik niueqateqarnissamut periarfissiilluni.
Sunali tamaat isigalugu Canada raajanik qaleralinnillu tunisassianik suliaqarnermut Kalaallit Nunaannit atortorissaarnerullunilu akikinnerusumik ingerlavoq. Isumaqatigiissutillu CETA-p "Kalallit Nunaata nunanut allanut tunisassiortarnera ajortumik sunnissallugu".
Qalerallit akiat unammillerneqarpoq
Qalerallit akiisa allanngornissaat Vittus Quajukitsup ilimagaa. Qanorli akeqalissanersut eqqoriarsinnaanngikkallarlugu. Canadamiut qaleraliutaannut akileraarutitigut akiliutaasartoq isumaqatigiissutip atuutilerneratigut 0 %-iulissaaq. Taamaammallu paasinarsereerpoq canadamiut aalisarnikkut suliffissuaqarnerat Europap iluani niuerfinnut akileraaruserneqanngitsunik isersinnaalerpat unammillernerujussuarmik kinguneqarumaartoq. Taamatut unammillertoqalernera Canadami EU-milu akiinut appariartitsinnaavoq, tamannalu kalaallit aalisakkanik avammut nioqquteqartuinut malunnaataassaaq.
Neriunartoqarporli
Nunatsinniilli suliarineqarnerata nalaani neriunartoqarpoq.
Naak isumaqatigiissut Europami-Parlamentianit akuerineqareerluni tunngavitigut atuutinneqarallartoq EU-mi ilaasortaasunit tamanit akuerineqaqqaassaaq.
- EU-mi ilaasortap ataasiinnaalluunniit isumaqatigiissummut akuersinngippat CETA-mik isumaqatigiissut atuutilerneqarsinnaanngilaq.
Taamatut pisoqarumaarnersoq piffissap takutikkumaarpaa.