Monday, September 11, 2017 - 09:04

Niuernermik ilinniartut ulluni marlunni aallarnisaassapput

Assi.: Leiff Josefsen
Nuummi Niuernermik Ilinniarfimmi ilinniartut aallarnisaanermik sammisaqassapput

Ulluni sisamani aggersuni Niuernermik Ilinniarfimmi, Nuummi, aallarnisaaneq pisussanngorpoq, atuarfiup ilinniartuinut 167-inut ilinniagaqartunullu aallarnisaanermik sammisaqartitsineq (Innovation Camp) ingerlanneqalerpat, ilinniarfik tusagassiuutinut nalunaarummi ilisimatitsivoq.

Isumassarsineq
- Suleqatigiinneq aqqutigalugu ilinniartut ilinniagaqartullu suleqatigiikkuutaarneqassapput inuit tallimat-arfinilikkaarlugit klassit ilinniakkallu suuneri akimorlugit.  Suleqatigiikkuutaani taakkunani ilinniartut ilinniagaqartullu isumassarsilluni piviusunngortitsinermik suliaqassapput, ullullu aappassaani naliliisussanut saqqummiussaqarlutik, Niuernermik Ilinniarfik ilisimatitsivoq.

Aallarnisaanermik saammisaqartitsineq ullut marluk ingerlanneqartarpoq, taamaalilluni nutarterinermi pisoqartitsinerit marluussapput ullut sisamat ingerlaneranni pisussat. Ilinniartut 85-it ilinniagaqartullu pisoqartitsinermi, tassa ataasinngornermi marlunngornermilu ilaatinneqassapput, sinnerinullu ilinniartunut 82-inut, skema malillugu, aallarnisaaneq pingasunngornermi sisamanngornermilu ingerlanneqassalluni.

Aamma atuaruk: NI Nuummi ilinniartut suliffeqarfiit pillugit pinnguarluni unamminermi ajugaaniutivilersut

Ilinniarfinnit assigiinngitsuneersut
Ullut marluk ingerlanerini ilinniartut ilaatigut najoqqutassiamik ineriartortitsineq aamma sullitanik uppernarsaaneq suliarissavaat.

Ilinniartut ilinniagaqartullu ilaatinneqarput, TNI, TNI 18, NI1, akademiuddannelsimi IT-mik aqutsineq aamma teknologi, akademiuddannelsimi nunani tamani niuerneq  tuniniaanerlu, akademiuddannelsimi nunani tamani assartuineq pilersaarusiornerlu kiisalu akademiuddannelsimi aningaasaqarnermi aamma isumalluutinik
aqutsineq.

Naliliisartut ukuupput:

  • Simon Westmann, aningaasaqarnermik siunnersuisartoq, Sermersooq Business Council
  • Rasmus Sembach, Air Greenland
  • Maria Schmeltz Hansen, ilinniartitsisoq, NI Nuuk
  • Paninnguaq Høegh, inuussutissarsiornermi siunnersuisartoq, Sermersooq Business Council
Seneste nyheder / Nutaarsiassat kingulliit