Nuuk
Niuerneq pillugu saqqummersitsineq: Islandimiut suliffeqarfii assigiinngitsut saqqummiissapput
Katuami Islandimik ulloqartitsisoqassaaq tallimanngorpat
Kulturikkut illorsuarmi Katuami Nuummiittumi Islandi pillugu ulloqartitsisoqarnissaani Islandimiorpassuit Nuummukakaapput.
Islandip kalaallit nunaatalu niuernikkut suleqatigiiffiat tusagassiutinut nalunaaruteqarpoq.
Nuummi Islandip ullua tallimanngorpat oktobarip 24-ani ingerlanneqassaaq. Islandimiut suliffeqarfii 30-t peqataassapput.
Suliffeqarfiit tunisassiatik kiffartuussinertillu Katuami saqqummersissavaat kalaallillu suliffeqarfiutaannik ataatsimeeqateqarlutik. Nuummi Islandip generalkonsuuleqarfia aaqqissuussinermi peqataavoq Kalaallit Islandimiullu niuernikkut siunnersoqatigiiffiat peqataalluni.
Suleqatigiinnerunissaq
Islandip ulluanik aaqqissuisarnerup annermik siunertaraa nunat eqqaamioriit akornanni niueqatigiinnerulernissaq kiisalu Islandimi nioqqutissat kalaallinut atuisartunut ilisaritinnissaat. Taamaattumik manna periarfissatsialaavoq suliffeqarfiit kalaallinut niuerusuttut nunat akornanni suleqateqalernissaannut.
Suliffeqarfiit akornanni ataatsimiinnernik aaqqissuisoqassaaq nioqqutissanik kiffartuussinermillu atuisunut nittarsaasoqarluni, isumasioqatigiittoqarluni nunat marluk akornanni periarfissat assigiinngitsut pillugit.
Ukiut tallimassaanni manna aaqqissuussineruvoq siornalu aaqqissuisoqarmat Islandimi suliffeqarfiit aatsaat taamma amerlatigisut peqataapput suliffeqarfiit 30-init amerlanerusut Nuuk tikeraarmassuk.