handelsmesse

Niuerneq pillugu Island Nuummiittoq

Kulturikkut illorsuarmi Katuami Islandimi niuerneq pillugu assigiinngitsunik tallimanngorpat naapeqatigiittoqassaaq

Tallimanngorpat Katuaq niuernikkut saqqummersitsinermi, skakkimik aaqqissuussinermi tunissutitalimmi, Islandip aningaasaqarnera pillugu oqalugiarnermi Islandimiullu filmiliaanik takutitsinermi ingerlatsiviussaaq

Sisamanngornermi Islandimi suliffeqarfiit 30-t missaanniittut aallartitaat Nuummut missapput. Nioqqutissaatitik suliffeqarfiutiminnilu kiffartuussinertik pillugu saqqummersitsissapput nunatsinnilu inuussutissarsiortut ataatsimeeqatigisarlugit. Ukiut sisamassaanik Promote Iceland aamma Air Iceland Islandimi nunatsinnilu suliffeqarfiit suleqatigiinnissaannut aggersaasuuvoq.

- Islandimi suliffeqarfiit Kalaallit Nunaannik soqutiginninnerujussuat nuannaarutigeqaarput, tamannami peqataasut amerlassusaannit aamma takuneqarsinnaavoq. Suliffeqarfiit aalisarnerup, inuussutissalerinerup, aningaasaliinerup, poortuutissalerinerup, umiarsuarmik assartuinerup, nukissiornerup, assigiinngitsunik siunnersuinerup, pequtinik tunisassiornerup, naqiterinerup uuttortaanerullu iluani suliaqartuupput, taama oqaluttuarpoq Promote Icelandimi suliniummi aqutsisoq Adalsteinn Haukur Sverrisson.

Sisamanngornermi ualikkut tallimanngornermilu ullaap tungaani Hotel Hans Egedemi inuussutissarsiornermik suliallit akunnerminni ataatsimeeqatigiittarnissaat ingerlanneqassapput.

Skakki, oqalugiarnerit filmillu
Inuussutissarsiuteqartut kisimik niuernikkut saqqummersitsinermi qaaqquneqanngillat. Tallimanngornermi marlunut Katuami Hans Lyngep inersuaa, Inersuaaraq paarlersuarlu meeqqanut, inuusuttunut utoqqarnullumi aaqqissuussiviussapput.

Hans Lyngep inersuaani Islandimi nunatsinnilu inuussutissarsiortut oqalugiassapput nunat aningaasaqarnerannut aningaasaliinissamullu periarfissat pillugit.

Paarlersuarmi suliffeqarfiit saqqummersitsivii takuniarneqarsinnaapput nioqqutissallu pillugit apersuisoqarluni.

Aamma marlunut meeqqat 10-nik ukiullit Inersuaaqqamut qaaqquneqarput skakkertartullu peqatigiiffianit Hrókurinnimit Air Icelandimillu tunissuteqarfigineqarlutik. Tunissutaassapput skakkerutit skakkernissamullu ilitsersuutit kingornalu skakkertoqarluni.

Naggataagut inuusuttut ilinniarfinniittut Islandimiut filmiliaanik isiginnaarnissaminnut qaaqquneqarsimapput takutinneqassalluni filmi ‘Málmhaus’ (Metalhead) Katuap filmertarfiani nalunaaqutaq 16.30. Filmi Islandimi takuteqqaarneqaqqammerpoq nunaannarmi pisunik pissanganartuliaalluni. Tuluttut allagartaqarpoq inuusuttullu billitsinik aallersinnaapput Katuami nal. 15-miit.

Powered by Labrador CMS