sociale medier

Nittartakkatigut qinngasaarisarneq angajoqqaat pinngitsoortissinnaavaat

Nittartakkatigut qinngasaarneqartarnermit imminut innarlernissaq qaninnerulersittaraa misissuinerup takutippaa. Nittartakkami ileqqorissaarnissamik angajooqqaat meeqqaminnut kaammattuisarnissaat qinngasaarinaveersaartitsisup kaammattuutigaa

Nittartakkatigut qinngasaarneqartarnermit imminut innarlernissaq qaninnerulersittaraa misissuinerup takutippaa. Nittartakkami ileqqorissaarnissamik angajooqqaat meeqqaminnut kaammattuisarnissaat qinngasaarinaveersaartitsisup kaammattuutigaa

Meeqqat nittartakkatigut qinngasaarukkaangata qinngasaarneqartumut annernarsinnaasorujussuuvoq. Taamaammat angajoqqaat meeqqatik internetsikkut naapittarfimmi Facebookkikkut Instagramikkulluunniit sulerinerinik eqqummaariffiginnittariaqartut qanorlu ileqqulersornissaannik siunnersuisassallutik.

Qinngasaarinnginnissamik siunnersuisartoq Red Barnet-imeersoq Lars Netteberg taama kaammattuuteqarpoq.

Red Barnetip qinngasaarisarnerup akiorniarlugu suliniutaani taanna suleqataavoq. Angajoqqaallu nittartakkatigut qinngasaarisarnerup akiornissaanut pingaarutilerujussuusut isumaqarluni.

- Qinngasaaraluni allakkaanni qanoq isumaqarnersoq qanorlu kinguneqarsinnaanersoq eqqartortarnisaa pingaaruteqarpoq. Meeqqat attaveqartarfiit qanoq atornissaat ilisimasaqarneruffigisariaqarpaat.

- Meeqqavit Facebookkertut sanianut ingillutit aperisinnaavat kina allaqatigineraa. Allaqatigiinnerlu nuanninnginnersoq, Lars Netteberg oqarpoq.

Angajoqqaatut nakkutiginninnissaq pingaaruteqartoq Berlingskep misissuinerata takutippaa. Anitsiarfimmi qinngasaarinermit nittartakkatigut naapittarfinni qinngasaarineq annernarnerusoq misissuinermi paasineqarpoq.

Imminut toquttarnermut ilisimatusarfiup misissuinermini atuartut 3000-nit ikinnerunngitsut apersorsimavai.

Meeqqat nittartakkatigut qinngasaarneqartartut imminnut innarlernissaminnut ilimanaateqarnerusoq, soorlu imminut kilertiterluni, atuarfimmi qinngasaartinnermit misissuinerup takutippaa.

- Oqarasuaat angallattagaq qarasaasiarluunniit qamiinnarneqarsinnaanngillat. Ulloq unnuarlu qinngasaarineq ingerlasinnaavoq arajutsiuminaattorujuullunilu, Lare Netteberg oqarpoq.

Angajoqqaatulli nittartakkatigut qinngasaarisarneq akiornissaa ajornakusoorsinnaasoq nassuerutigaa.

- Meeqqamit tatigineqarneq annertusariaqarpoq. Meeqqallu internetsimi sulerinersoq soqutigisariaqarlugu.

- Meeqqat nittartakkami naapittarfimmi atugaanut isiinnarnissaq aaqqiissutissaanngilaq. Saniani alaatsinaattariaqarpoq sulerinersoq.

Meeqqat pingajoraarterutaat qinngasaartilluni misiginikuugaa misissuinermi paasineqarpoq. Taakkulu sisamaraarterutai nittartakkatigut qinngasaartinnikuusimallutik.

Nittartakkatigut qinngasaarisarnermi akiuiniarnermut angajoqqaat peqataanissaat pingaaruteqartoq Danmarkimi meeqqat atuarfianni atuartunut siulittaasoq isumaqarpoq.

- Ajornartorsiummut akuliunnissaq qunugineqassanngilaq. Nittartakkatigummi qinngasaarineq qaqugukkulluunniit pisinnaavoq.

- Angajoqqaajusut ajornartorsiuteqartoq paasiniassallugu pisussaaffigaat, akuliunnissaq qunuginagu, oqarpoq.

Naak akisussaaffik anneq angajoqqaaniikkaluartoq atuarfeqarfiit iliuuseqaqataanissamut aamma akisussaaqataapput.

Taamaamma angajoqqaajusup qinngasaarisarneq pillugu atuarfimmut saaffiginnissasoq atuartut siulittaasuat isumaqarpoq. Qinngasaarisorli qinngasaarisulluunniit oqaloqatigalugit ajornartorsiut aamma aaqqiivigineqarsinnaavoq.

- Aporaattoqalersinnaanerali navianarpoq. Angajoqqaajusulli namminneq aalajangiiffigissavaat, Jens Vase oqarpoq.

Atuarfimmi nittartakkatigulluunniit qinngasaarinerit angajoqqaat eqqumaffigissagaat, atuarfiup angajoqqaallu attaveqaqatigiinneranni siulittaasoq Mette With Hagesen isumaqarpoq.

- Pissuserissaarneq naalannerlu atuarfimmi nittartakkatigullu naapittarfinnilu assigiittussaapput. Tamanna eqqumaffigisariaqarparput. Snapchatikkut atuarfimmiluunniit iluamik pissusilersornissaq pingaaruteqarpoq, oqarpoq.

/ritzau/

Powered by Labrador CMS