tapersersuineq
Nittartakkami imminut assilisat #sælfie-t amerlasuut
Kalaallit Nunaanni piniartut tapersersorniarlugit tamalaat nittartagaanni imminut assileriarluni assinik ikkussinerit amerliartorput, qallunaaq isiginnaartitsisartoq Iben Hjejle aamma assinganik iliorpoq
Kalaallit Nunaanni puisinniartarneq pillugu Christiansborgimi sisamanngornermi tusarniaassutigineqarnera ilutigitillugu piniartunut tapersersueqqusisut Inuit Sila Facebookikkut quppernermini inunnut kajumissaarivoq, inuit nammineq assileriarlutik assitik Instagramimut, Facebookimut, Twitterimullu ilisassagaat #sælfie-millu hashtagilerlugu. Taamaalilluni puisinniartartunut tapersersuinermik takutitsisoqassaaq.
Piniartunik tapersersueqqusisut Inuit Silap kajumissaarinerat qallunaap isiginnaartitsisartup Iben Hjejle-p aamma peqataaffigaa, namminerlu assilereerami ima allalluni:
'Haluu! Ibenimik ateqarpunga, assilu #sælfie-ulluni. Immaqa inuit amerlavallaanngitsut ilisimavaat, kisianni atiga Iben kalaallit aterivaat isumaqarluni 'Sumiiffimmi piffissamilu eqqortumi inunngorsimasuuguni puisinniallaqqissorsuussussaagaluaq...' Tamanna ilumuunngilaq. Taama isumaqarnissaa neriuutigigaluaqaara, PINIARTULLI TAPERSERSORPAKKA!
Asannittumik inuulluaqqusillunga
#sælfie #puisifie #støtfangerne @inuitsila’
Inuitsila.org-ip nittartagaani kajumissaarisoqarpoq 'Aap, EU-p kinaassusersiorluni inatsisiliaa allanngortittariaqarpoq' atsioqataaffigineqassasoq.