Aalisarneq
Nipisat suaat tunisat pakatsinartumik ikittut
Nipisat suaat, Royal Greenlandip tunitsiviinut suliffissuinullu tunisat siornamut sanilliullugit 40 procentimik ikinnerupput. Aalisartut Piniartullu Kattuffiata KNAPK-p malittarisassat atorunnaarseqquvai
Ukioq manna nipisat suanniarneq unippoq.
Nipisanniarnerli pakatsinarsimaqaaq, tassami nipisat, suaat Royal Greenlandip tunitsiviinut suliffissuinullu tunisat siornamit 40 procentimik ikinnerupput, pisassiissutit 1500 tonsit 2/3-liinnaat pisarineqarsimallutik.
Aalisartut piniartullu kattuffiat KNAPK isumaqarpoq nipisanniarnerlunnermut pissutaasimasut silarlunnera ullunullu 47-nut malittarisassaq.
Malittarisassaq atorunnaarsillugu
Ingerlatsivinnut arfineq-marlunnut agguataarineq siorna eqqunneqarpoq, ingerlatsivinnilu ataasiakkaani aalisartut pisassatik ullut 47-t angullugit piniarsinnaavaat.
Ingerlatsivimmi pisassat tamarmik ullut 47-t iluanni pisarineqanngippata sinneruttut ingerlatsivimmut tullermut ingerteqqinneqartarnissaanik malittarisassaq aamma siorna eqqunneqarpoq.
KNAPK, aalisartut isumasioqatigalugit ingerlatsivinni arfineq-marlunni nipisanniarnerup qaqugukkut aallartinnissaanik aalajangiisartoq, isumaqarpoq ullunut 47-nut malittarisassaq atorunnaarsinneqartariaqartoq.
1000 tonsit tunineqarput
– KNAPK-mi sulissutigaarput ullunut 47-nut malittarisassap atorunnaarsinneqarnissaa, ingerlatsivinnullu pisassiissutinik taarserlugu, taamaasilluni ingerlatsivinni tunitsiviit aalajangertassavaat nipisanniarfinngoraangat suaat tunisassiarineqarnissaannut qaqugukkut naammattumik angissuseqalersimanersut, Petrus Biilmann Royal Greenlandip nittartagaanut oqarpoq.
– Taakkua aamma aalajangertassavaat aalisarneq unittussanngoraangat suaat tunisassiarineqarnissaminnut qaqugukkut inerippallaalersimanersut. Tassa imaappoq, sulissutigaarput pisassat tamarmik pisarineqarnissaasa tungaanut - imaluunniit suaat tunisassiarineqarnissaminnut inerippallaalersimanissaannut, aalisarneq ingerlaannartassasoq, Petrus Biilmann oqarpoq.
Siorna nipisat suaannik pisassiissutit 1500 tonsit aamma tamakkerneqanngillat, tassa suaat 1000 tonsit missaannaanniittut tunineqarmata.