nipisat suaat
Nipisaat suaannik isumaqatigiissut KNAPK-mi ilaasortanut iluaqutaassaaq
Nipisaat suaannik tunisaqartarneq pillugu isumaqatigiissuteqartoqarpoq sapaatip akunnerani matumani
Kalaallit Nunaanni Aalisartut Piniartullu Kattuffiat (KNAPK) Royal Greenlandilu 2015-imi piffissaq nipisanniarfiusoq naallugu atuuttussamik nipisaat suaannut akit bonusisiassallu pillugit isumaqatigiissusiorput.
Nipisaat suaannik tunisinermi akiusup appasinnerpaaffissaa kiilumut 20 kr.-ussaaq bonusisiassarlu kiilumut 1 koruuniussalluni.
Ilasortanuinnaq atuutissaaq
2015-imi apriilip aallaqqaataaniit 2015-imi decembarip aallaqqaataata tungaanut tunisinermi Royal Greenlandip suliffissuaqarfinnut pisisartuminut agguaqatigiissillugu akigititaa tunngavigalugu bonusisiaqartitsisoqartassaaq, Royal Greenland ilisimatitsivoq.
Isumaqatigiissummi allassimavortaaq nipisaat suaat ukioq manna piffissami nipisanniarfiusumi tulaanneqartut MSC-imit akuerineqassappata nipisaat suaannik tunisinermi kiilumut bonusisiassaq 1 koruunimiit 2 koruunimut qaffanneqassasoq.