Nipilersoqatigiit Small Time Giants internetsikkut toqqaannartumik tusarnaartitsissaaq unnugu

Small Time Giants Københavnimit sungiusartarfimminnit tusarnaartitsissapput unnugu nalunaaqutaq 19.00. Tusarnaartitsinerat toqqaannartumik internetsikkut isiginnaarneqarsinnaavoq, tassani nuuteeraliaminnit saqqummeqqammersumit ’Stethoscope’-mit atuissapput. Nuuteeraliaat Danmarkimi iTunesimilu ullumi pisiarineqarsinnaalerpoq.

Tusarnaartitsineq YouTubekkut malinnaaffigineqarsinnaassaaq toqqaannartumik, taamaasilluni qarasaasiaqaraanni smartphonekkullu nipitalimmik assitalimmillu malinnaaffigineqarsinnaassalluni. Nuuteeraliaanni nipilersuutit tamarmik appinneqassasut Small Time Giants neriorsuivoq.

- Nuuteeraliarput Kalaallit Nunaanni Danmarkimilu kisimi saqqummertussaannginnera pissutigalugu sumi saqqummersitsinitsinnut atatillugu tusarnaartitsissanerluta nalornissutigeqqaarnikuuarput. Sungiusartarfitsinnit tusarnaartitsiniarluta aalajangiupparput, saqqummersitatsinnimi nipilersuutigineqartut tamaasa tassani pinngorput. Taamaasilluni nunarsuarmi sumiikkaluaraanniluunniit tusarnaartitsinerput malinnaaffigineqarsinnaassaaq, nipilersoqatigiinni erinarsortuullunilu guitarertoq, Miki Jensen, Sermitsiaq.AG-mut oqarpoq.

Small Time Giantsip tusarnaartitsinera toqqaannartumik qulaani isiginnaarneqarsinnaavoq