Imernalaaq Festival
Nipilersoqatigiit ‘Simik’ aliannaartitsilerput
Imernalaaq-festivaali, ulluni 30. aamma 31. januar Nuummi aaqqissuunneqalerpat, ‘Simik’, ilaatigut KNR-ip radioanit atoqqusaajunnaarsimagaluartumik saqqummersitsinikut, aliannaartitsisussanngorput
Nunatsinni Nipilersortartut, kulturikkut illorsuaq Katuaq peqatigalugu, Imernalaaq Festival, ilaatigut Kodap nersornaasiuttagaanik 2013-mut 2014-mullu tunngasunik tunniussaqarfiusussaq, ulluni 30. aamma 31. januar aaqqissuutissavaat.
Nipilersortartoqatigiit aliannaartitsilersut
Imernalaaq Festival aallarnerlugu nipilersoqatigiit ‘Simik’, 1978-imiilli nipilersoqatigiittalersut, nipilersussapput. Nipilersoqatigiinni pingaarnertut inuttaapput qatanngutigiit Frederik Lynge, Steen Lynge aamma Steffen Lynge.
KNR-ikkut atoqqusaajunnaartoq
‘Simik’, sisamanik saqqummersitsinikoq, aaqqissuisut najoqqutaralugit sammersissimasatik ‘Iliveqarfik’, ‘Tusaavinga’ aamma ‘Aylayla’ ilaatigut aliannaarlutik Imernalaaq Festivalimi appisimaartassavaat.
Saqqummersissisimasaat ‘Iliveqarfik’, ikinngutit siulillu iliveqarfiat pillugu taallartalik, ilaatigut KNR-ip radioatigut appisimaaqqusaajunnaarnikuusimagaluarpoq. Nipilersoqatigiit ‘Iliveqarfik’ toqup paquminartutut pinnagu eqqartorneqarsinnaanera siunertaralugu saqqummersinnikuusimavaat.
Qatanngutigiit Lyngekkut Lars Peter Stubkjær, Erneeraq Zeeb aamma Jason Nystrup nipilersoqatigissavaat.
Taakkua saniatigut nipilersoqatigiit ‘Katuma’, piffissami matumani ‘Allanngulerpugut’-mik qulequtsersimasaminnik saqqummersitseqqammersut, kiisalu Kimmernaq ukiualunni uninngasimasoq, tusarnaartitsissapput.
Naneruaq aamma Kimia arfininngornermi
Kodap kalaallinut nipilersortartunut 2013-imi aamma 2014-imi nersornaasigassai saqqummiunneqareerpata Imernalaaq Festival nipilersortartunik allanik tusamaasanik appisimaartoqarluni arfininngornermi nanginneqassaaq.
Nipilersoqatigiit ilisarisimaneqarluartut Naneruaq, ilisimaneqareersunik nipilersukkanillu aamma nutaanik atuisarlutik appisimaarumaartut, Imernalaaq Festivalimi aaqqissuisut allapput.
Naneruakkunni nipilersortuupput Niels Platou, Elo Geisler (Nunatsinni Nipilersortartut peqatigiiffianni siulittaasoq), Ove Heilmann kiisalu Niels Ole Olsen.
Naneruakkut saniatigut Kimia, aamma piffissami matumani saqqummersitseqqammersut, Mike Fencker Thomsen erinarsortoralugu appisimaassapput. Saqqummersitaat ‘Kimia’ Mike Fencker Thomsenip siullermeerluni saqqummersitaraa.
Imernalaaq aaqqissuisut nassuiaanerat najoqqutaralugu isumaqarpoq qilaatip isaata sajuppilunnera/issalunnera.