Nioqqutissat akisoqisut misissuiffigineqassapput

Partii Naleqqaminngaanneersoq Per Rosing-Petersen, nunatsinni nioqqutissat akiisa qaffasinnerujussuat pillugu Naalakkersuisut misissueqqullugit peqquneqassasut, aalajangiiffigisassatut siunnersuuteqartuuvoq.

Innersuussutit ujartorneqartut

Siunnersuummi aammattaaq piumasarineqarpoq akit qanoq appartinneqarnissaannik innersuussuteqartoqaqqullugu.

Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoq Hans Enoksen akissuteqaataani Naatsorsueqqissaartarfiup kisitsisaatai innersuussutigineqarput, "nunatsinni akiusut 6,3 %-imik qaffasinnerusut, nioqqutissanut kiffartuussinernullu danskit akigititaannut ataatsimut isigalugu".

Nioqqutissallu ataasiakkaat pillugit paasinarsivoq, ”inuussutissat aamma imeruersaatit aalakoornartortaqanngitsut”, ”imigassat aalakoornartut aamma tupat” kiisalu ”attaveqaqatigiinneq” eqqarsaatigalugit nunatsinni akiusut qaffasinnerusut.

Killormuanillu inigisaq, imeq, innaallagiaq, gassi, il.il kalaallinut akikinnerulluni.

Siunnersuut taperseraa

- Kalaallit Nunaanni naatsorsueqqissaartarfiullu misissuinera paasissutissanik aamma imaqarpoq akit EU-mi suli Kalaallit Nunaannit aamma Danmarkimit appasinnerusut. Taamaattumillu isumassarsiatsialaavoq nunani allani sanilliunneqarsinnaasuni akiusut misissuinermut ilanngunneqarnissaat, Hans Enoksen oqarpoq, Naalakkersuisullu siunnersuummut tapersiillutik misissuititsiniartut naqissuserlugu.

Siunnersuut aqagu sisamanngornermi Inatsisartuni oqallisigineqassaaq.