Atuisoq

Nioqqutissat akiinik misissuineq annertooq

Illoqarfinni assigiinngitsuni nioqqutissat akii nikingavallaanngitsut Atuisoq misissuereerluni naliliivoq

Atuisunut siunnersuisooqatigiit sinnerlugit Atuisoq nunatsinni illoqarfinni nunaqarfinnilu assigiinngitsuni ulluinnarni pisiassat akinik misissuineq ingerlallugu naammassivaa. Misissuinerup siunertaraa ulluinniarni pisiassat akii pillugit atuisunut qaammarsaanissaq. Taamatuttaaq siunertaavoq nunatsinni sumiiffinni assiginngitsuni ulluinnarni inuuniarnikkut akit assiginngissuteqarnersut ersersissallugu.

Pisiassat assiginngitsut 204-it nalinginnaasumik akiginiaanermi aki novembarip 27-ani 2013 atuutsinneqartoq aallaavigalugu akinik misissuineq ingerlanneqarpoq. Ulloq taanna pisiassaq pineqartoq neqeroorutaasimappat ulluinnarni akiginiaanermi aki atuuttoq nalunaarutigequneqarpoq.

Misissuinermi ilaatinneqartut tassaapput illoqarfinni nunaqarfinnilu pisiniarfiit ulluinnarni pisiarisartakkanik tuniniaasartut. Pisiniarfiutillit illoqarfinni nunaqarfinnilu arlariinni pisiniarfinnik ingerlataqartut nalunaarutigaat sumiffinni assigiinngitsuni akit atuutsinneqartut assigiittut.

Nikingassut annertunngilaq
Misissuinermi erserpoq pisiassat taakku 204-iusut akornanni akit nikerarnerat agguaqatigiissillugu 14procentisoq. Tassa soorlu pisiassaq ataaseq 20 koruuneqarsimappat taava pisiniarfinni assigiinngitsuni agguaqatigiissillugu 17-23 koruunit akornanni akeqartartoq. Misissuinermi aamma paasinarsivoq pisiniarfiutillit arlariinnik pisiniarfiutillit nalinginnaasunik pisiassanik akisunerusumik tuniniaanngitsut.

- Misissuinermi paasisat aallaavigalugit nunatsinni pisiassat nilinginnaasut akii sumiiffimmiit sumiiffimmut nikingassuteqarujussuanngitsut Atuisoq naliliivoq. Akit pillugit paasissutissat aamma ersersippaa pisiniarfinni arlariinni niuerniarsinnaaneq periarfissaatillugu, taava pisisartumut neqeroorutinik pisinissamik ujartuisinnaaneq periarfissaasoq, aammalu pisiniarfik ataasiinnaq pisisartumut niuerniarfigiuannassallugu akilersinnaangitsoq pisiassammi nalinginnaasumik akii nikingassuteqarujussuanngimmata, Atuisoq allappoq.

Atuisup akinik misissuinerani paasissutissat uani takusinnaavatit. Angerlarsimaffimmi ulluinnarni atortut, Suaasat pasta-llu, Qajuusat, akuutissat, allallu kiisalu Pisiassat qerisut.

Misissuineq qanoq ingerlanneqarsimanersoq aamma takuneqarsinnaavoq: Ima iliorpugut

Powered by Labrador CMS