Ninimut katersat ima amerlatigipput

100.000 koruuningajaat.

Kræftimik nappaateqartoq Nini Tessing ikiorserniarlugu aningaasat taamak amerlatigisut katersorneqarput. Taamak nalunaaruteqarpoq Nini Tessing ikiorserniarlugu ataatsimiititaliaq.

Marlunngornermi Nini Tessingip aningaaserivimmi kontoanut 96.499 koruunit nuunneqarput.

- Ataatsimiititaliamit katersiniarnermi ikiuuttut tapersersuisullu tamaasa qutsatigaavut. Ajornanngitsuuppat ikiuuttut tamaasa ataasiakkaarlugit qujaffigerusukkaluarpavut, naluneqanngilarli taamaasiorsinnaanngitsugut. Ilisimassavarsili qamuuna iluunngarluta qujassutissaqaratta, suliniummik aallartitsisoq Kalaallit Illuutaanni ilinniartut siunnersortaat Pia Rosing Heilmann oqarpoq.

Taassuma facebook aqqutigalugu Nini Tessingimut ikiuiniarneq februaarip 23-anni aallartippaa.

Katersuiniarneq naggaserlugu Small Time Giants qaammatip aallartinnerani tusarnaartitsipput.

Naatsorsuutigisanit amerlanerungaartut

- Tapersersorneqarnerujussuaq aningaasallu katersorneqartut amerlanerat naatsorsuutigisanit pitsaaneroqaaq, Pia Rosing Heilmann nuannaaqisoq oqarpoq.

- Ninimut katersineq kuseriarnertut siaruaappoq. Maannakkut Kalaallit Nunaanni patermik tunisisartunngornissaq periarfissaalerpoq. Tamatuma saniatigut Kalaallit Nunaanni kræftimik nappaateqartuulluni napparsimasumillu ilaqutaqarluni qanoq ilungersunartiginera oqallisaalerpoq, pingaartumik kilometerinik tusindinik arlalinnik ungasissusilimmiilluni, Pia Rosing Heilmann oqarpoq.

Facebookimi katersuiniarnermut qupperneq suli ammavoq ataatsimiititaliamit Nini taassumalu ilaqutai isumaqatigalugit, quppernermut assit ivertinneqartassapput napparsimasullu katsorsartinneranit paasissutissat aamma ivertiterneqartassallutik. Kisianni konto aningaasanik katersivik matuneqarpoq.

Kræftimik napparsimasoq Nini Tessing suli nappaammut akiuuppoq. Nakorsat ilimagaat suut tamarmik pissusissaq naapertorlugu ingerlassappata juunip 18-ianni milliamit nunamit allameersumit patermik ikkussisoqassaaq.

Katersinermik ataatsimiititaliami peqataapput Susanne jense, Tupaarnaq Kreutzmann aamma Pia Rosing Heilmann