Arnanut
Nina: Ilitsoqqussaralugu oqaatsinnik asannittunngorpunga
Nina Kreutzmann Jørgensen maanna nuusiaminik oqaluttualiaaqqanillu saqqummersitseqqammerpoq, taakku Ninap qallunaatut allassimasaanik siulliupput
Nina Kreutzmann Jørgensen kingullermik ukiut arfineq-pingasut matuma siorna tusarfigaarput. Taamaammat novembarip 11-anni oqaluttualiaaqqat nuusiarlu 'Hun står i nordenvind' Ninap saqqummersimmagit, isumalluarneq annertuvoq.
Tassami Ninap saqqummersitaa Silarsuaq Takuiuk aamma Hun står i Nordenvind imminnut ungaseqaat.
– Nalunngilara inuit ilaat eqqarsarumaar- toq: ”Øv! Ninaanngilaq”. Kisianni aamma uangaasunga nalunngiinnassavaat. Arlaatigut malugisinnaavara attortissutigilaariga, kisianni oqaatsinnik ilitsoqqussannik asanninnissamik nassuerutiginninniarninni aqqusaarsimasakka naluaat.
Matumik aammaasoq
Taassuma ilitsoqqussaralugu oqaatsinik asanninneq ajunngitsoq nassuerutigisimaneranik oqarpoq, naak aamma kalaaliulluni qallunaatut oqaaseqartuugaluaraanni.
- Allaanngivippoq ilunni matumik ukiorpassuarni matoqqasimasumik ammartoqartoq. Allaanngivippoq ilunni sikaaveqartoq piuneranik ilisimanngisaannarsimasannik. Sikaavimmiipporlu oqaatsinnik asannittariaqarninnik nassuerutiginninneq. Asanninnertut ittumik pissuseqarfigisinnaalluarpatit, Nina kipisuungajattartumik nipeqarluni sooq qallunaatut siullermeerluni nuusiornini oqaluttualiaaqqanik imaqartoq nassuiniaatigalugu oqarpoq.
Atuaruk: Nina atuakkiaqqaatiminit atuffassisoq tusarnaaruk
Nammineq nunagisami ikinnerussuteqartut
Oqaatsit Ninamut sammisaapput mianernartut. Kalaallit Nunaanni angerlarsimaffimmi qallunaatuinnaanerusoq oqaluffiusumi peroriartorsimavoq. AB-mik atuarfimmi qallunaatuinnaq oqaluffiusumi atualerpoq, kalallisullu oqalussinnaallunilu erinarsorsinnaagaluarluni, qallunaatut oqaatsit ilitsoqqussaralugit oqaaserai.
– Kalaalerpassuuvugut qallunaatuinnaq oqaasillit, inuttut naleqassutsitsinni ilorlikkut qupinillit kigarnillilluunniit. Qallunatuinnaqoqaasiliulluni kalaaliuneq qanoq ittuunersoq ilisimanngikkaanni tamanna nassuiaruminaappoq. Suna pineqarnersoq uaguinnaat ilisimavarput. Kalaallit Nunaanni kalaallisut oqalussinnaani peroriartorsimagaanni ikinnerussuteqartutut misigisimanartarpoq. Kalaallisut pikkorinnerulernissamik sorsuutiginnittuartariaqartutut misigisimajuarnartuuvoq, Nina oqarpoq.
Ninap apersorneqarnera tamaat Arnanut nutaami saqqummeqqammertumi atuaruk, uani pisiarisinnaavat.