partii inuit
Nikku: Isornartorsiuineq piviusorsiunngilaq
Partii Inuit siulittaasuata Nikku Olsenip Markus E. Olsenip isornartorsiuinera tunngavissaqarsorinngilaa taanna partiip siuttuinut akerliulluni tunuareersoq
Partii Inuit siulittaasuat Nikku Olsen pissutissaqarsorinngilaq partiimi qullersanik taarsersuinissamut naak partii sinnerlugu Inatsisartuni qineqqusaaqataasoq Markus E. Olsen isornartorsiuigaluartoq. Markus E. Olsenip iliuusai Nikku Olsenip aalassatsitseriarnertut nalilerpai.
Markus E. Olsen Partii Inuinnit tunuarpoq isumaqarami partii matoqqavallaamik aqunneqartoq.
- Tamanna piviusorsiortuunngilaq. Parteerput ukiormanna aatsaat aallartippoq suliassallu pingaartut inatsisartuni maanna suliaraavut. Taamaammat immikkut ittumik ataatsimeersuarnissamut piffissaaanngilaq, Nikku Olsen Sermitsiaq.AG-mut oqarpoq.
Markus E. Olsen tapersersortissarsiorsimagaluarpoq Partii Inuit immikkut ataatsimeersuarnissaannut nammineq oqarneratut partii iluamik aqunneqalerniassammat.
- Pissaaneqarniuteriaraluarneruvoq. Kisianni tassa aalajangereernikuuvugut januar 2014-mi ataatsimeersuarniarluta. Uggornarpoq Markus E. Olsen taamatut pissusilersormat. Eqqissilluta sulisariaqarpugut ataatsimeersuarnissarlu piareersarlugu, Nikku Olsen oqarpoq.