tusagassiuutit
Nikku Hitlerimut assersuunneqartoq
KNR-ip nittartagaani pisortap Peter Troelsenip Partii Inuit siulittaasuat Nikku Olsen Adolf-imut assersuuppaa. Nikku Olsenip qularinngilaa Adolf Hitlerimut assersuussinerusoq
Partii Inuit siulittaasuat Nikku Olsenip KNR-ip nittartagaata pisortaa Peter Troelsenip oqaasiinut maalaarfigineqarsinnaasunut tamanut maalaaruteqarniarpoq. Peter Troelsen suleqatiminut nassiussiniarluni mail Nikku Olsenimut utertillugu nassiuttoorpaa, ilaatigut Nikku Olsen Adolf assersuullugu. Nikku Olsenip qularinngilaa tamanna Adolf Hitlerimut assersuussinerusoq.
Partii Inuit ataasinngornerup ullaavani tusagassiutinut nalunaaruteqarpoq partiip namminiilivinnissaq anguniarlugu sulissuteqarniartoq.
Utoqqatserneq iluaqutaanngitsoq
KNR-ip nittartagaani tamanna aamma sammineqarpoq, Peter Troelsenilu suleqatiminut ima nassiussiniarluni mailimik nassiussilluni:
'Adolfi saqqummeqqippoq nutaanik siulersuisoqalersimalluni. tamanna pillugu allaaserisaqalaarniarta, inuillu namminneq paasissavaat qanoq inuk taanna partiialu sianiitsiginersut.'
Tusagassiorfinnut partiinullu Peter Troelsenip allatani nassiuttoorpai.
- Uanga nammineerlunga kukkuneraara. Inatsisartunukarpunga Nikku Olsenimullu utoqqatseriartorlunga. Sianiilliorujussuarpungami, Peter Troelsen Sermitsiaq.AG-mut oqarpoq.
Kinguneqartariaqarpoq
Nikku Olsenilli Adolf Hitlerimut assersuunneqarnini akuerisinnaanngilaa.
- Aap ilumoorpoq Peter Troelsen uannut utoqqatseriartorpoq. Iliuuserineqartorli akuerisinnaanngilara. Naalakkersuisut siulittaasuannut Aleqa Hammondimut maalaarniarpunga, Kultureqarnermut naalakkersuisumut Nick Nielsenimut, KNR-ip siulersuisuinut, KNR-ip aqutsisuinut kiisalu tusagassiutit pillugit maalaaruteqartarfimmut maalaaruteqassaanga, Nikku Olsen Sermitsiaq.AG-mut oqarpoq.
Nikku Olsen Partii Inuit ukioq kingulleq pilersereeramiulli KNR-imit malersorneqarsimanini malugaa.
- Tusagassiutiniit taama naqisimaneqarsimanerput akuersaarneqarsinnaanngilaq, Nikku Olsen oqarpoq.
KNR-ip siulersuisuisa Nikku Olsenip maalaaruteqarnera nalilertussanngorpaat.
- KNR-ip pisoq kinguneqartissappagu allamik iliorsinnaassanngilanga, aalajangernissaat kisimi ataqqiinnartariaqassavara. Sianiilliorujussuarpungami, Peter Troelsen oqarpoq.