Nikku: Ammip qalipaataanik immikkoortitsinerunngilaq

Partii Inuit siulittaasuata Nikku Olsenip ammip qalipaataanik immikkoortitserpalaartutut KNRimit emailersimanerarneqarnini tunngavissaqannginnerarpaa. Erseqqissarpaali politikkikkut anguniagarigini qallunaat nunatsinni pissaanilittut inissisimanerat allanngortikkusullugu kalaallillu inissisimanerat nukittorsarlugu.

Nikku Olsenip eqqartuussissuserisoq imippaa KNR pillugu suliaqaqqullugu tassanilu piumasara KNRip ilumini attaveqartarsimanerata takunissaa.

- Tupinnartoqanngilaq eqqartuussissuserisumut imissutaanera. Suliarmi uanga nammineq suliarisinnaanngilara, Nikku Olsen Sermitsiaq.AG-mut oqarpoq.

Nikku Olsenip KNR-illu aaqqiagiinnginnerat aallartippoq KNRip nittartagaani aaqqissuisuugaluartup Nikku Olsen Adolfimut assersuummagagu Nikku Olsenillu qularinngilaa Adolf Hitlerimut assersuunneqarluni.

Tusagassiutit misissorniarpai
KNR Nikku Olsenimut utoqqatsereerpoq. KNRip siulersuisui aamma nalunaarusioreeerput tassanilu naqissuserpaat pisimasoq ataasiaannaartuusoq. Nalunaarusiarli Nikku Olsenip tutsuiginartutut isiginngilaa taamaattumillu qallunaaq eqqartuussissuserisoq suliakkillugu.

- KNRimut tusagassiorfinnullu tatiginninnermut pisimasup innarlernikuuaa. Politikkerit allat aamma sapaatip akunnera kingulleq naapitakka oqalupput eqqarsaatigalugu aamma namminneq allanut assersuunneqartarnerlutik, Nikku Olsen oqarpoq.

Nikk Olsen aamma KNR emailikkut attavigiittuarsinnarput tassanilu Nikku Olsen ilaatigut allassimavoq qallunaat tusagassiortut nikassaarpalaartuunerarlugit. KNRip tamanna ammik qalipaataanik assigiinngisitserpaalaartuunerarpaa.

- Politikkut anguniarparput Nunatta naalagaaffinngornissaa. Inuiaqatigiinni kalaallini qallunaat pissaaneqartorujussuupput tamannalu uagut allanngortikkusupparput kalaallit inissisimanerat nukittorsarlugu. Ammip qalipaataanik immikkoortitsisoqanngilaq, Nikku Olsen oqarpoq.

Taassuma suli aalajangiusimavaa arlaannut pituttorsimanngitsumit KNRip misissorneqarnissaa.

- Tusagassiorfiit misissorusuttorujussuuaatigut. Illuanut aamma sammisariaqarpoq. Uaguttaaq tusagassiutit misissorsinnaasariaqarpagut, Nikku Olsen oqarpoq.