Piiaaffiit
Nikkelissarsiornermi kilometerinik qulinik qillerisut
Ingerlatitsivik North American Nickel Maniitsup eqqaani savimernginik nalituunik nassaarnissartik isumalluarfigaat
Maniitsup kangia tungaani aasaq manna qillerilluartoqarpoq. Kilometerinimmi qulinik qillerisoqarsimavoq. Ingerlatitsiviup North American Nickel Inc. misissuileruttorput.
- 2016-mi misissuinitsinnit inernerit ajunngilluinnarput, North American Nickel-mi pisortaq Mark Fedikow oqarpoq.
Atuaruk: Isumaginninnikkut akisussaaqataaneq aatsitassarsiornerup iluani nuannaartorineqalersimavoq
Inerneqarluarpoq
Ingerlatitsiviup atiatut nikkelinik qalluinissamut misissuisoqarpoq. Qillerinermilu saviminernik allanik nalituunik aamma nassaartoqarsimavoq.
- Nikkelitalerujussuarnik nassaarpugut. Kobberit, koboltit, savimerngit platiniusut guldinillu aamma nassaallattaarluta, pisortaq nassuiaavoq.
Ingerlatitsivik 75 kilometerinik takissusilimmik suliaqarpoq. Misissuiffiusumilu nikkeleqarluarneranik takussutissaqarpoq.
- Qillerinissamut pilersaarusiornitsinni 2017-mi misissuiffipput annertuninngortinniassavarput. Piiaaffiinnaanani annertunerusumik periarfissaqartoq ilimagivarput, Mark Fedikow oqarpoq.
Ingerlatitsiviup aappaagi kilometerit 20-t qillissallugu naatsorsuutigaat.
Atuaruk: Napasup eqqaani nikkelisiorfik 50-inut inissaqalissaaq
Misissuisut
Ingerlatitsivik North American Nickel misissuisartut ilagaat. Tamanna isumaqarpoq misissuisoqaraluartoq ingerlatitsivik nammineq piiaaffeqalernissamik qulakkeerinnissimanngitsoq.
- Piaanissamik akuersissuteqalernissarput sulissutigaarput, Mark Fedikow oqarpoq.
- Misissuisartuugatta nammineq piiaaffeqalernissarput aalajangersinnaavarput. Imaluunniit suleqatigisariikkavut misilittagallit ingerlatitseqatigilersinnaallugit.
Piiaaffeqalernissaq suli ungasittoq
Ukioq manna misissuineq isumalluarnaraluartoq piiaaffeqalernissaq suli ilimanaateqanngilaq.
- Misissuineq inernerqarluaraluartoq akuersissuteqalernissamut qinnuteqaasiorneq ukiut tallimat arfineq-marlullu angusinnaasarpaat, Mark Fedikow oqarpoq.
Aatsitassarsiorneq naluneqanngitsutut allanngoriasaarsinnaasarpoq. Siunissamilu akit qanoq ikkumaarnersut naatsorsoruminaattarlutik allanngorartarmata.
Taamaattoqarneratalu nikkelimik piiaanerup saniatigut savimerngit allat piiarneqarsinnaaneri iluaqutitaqarpoq. Isertitanut tapertaasinnaammata.
- Maniitsup eqqaani nikkelimut piiaafeqalissasoq neriorsuutigigaluarukku unneqqarinnavianngilanga. Pissutsimmi allanngorartarmata. Kisianni oqareernertut maanna isumalluarnarpoq, Mark Fedikow naggasiivoq.
Savimernginut manngertorsinnaanngitsunut nikkeli atorneqartarpoq.