Savalimmiut
Niisarnarniarnermik akornusersuisut marluk tigusarineqartut
Inuit marluk Sea Shepherdimeersut ataasinngormat tigusarineqarput angallallu arsaarinnissutigineqarluni, avatangiisinik illersuiniaqatigiit Savalimmiuni niisarnarniarneq akornusersormassuk
Angut 31-nik ukiulik arnarlu 40-nik ukiulik niisarnanut inatsimmik unioqqutitsisutut unnerluutigineqarput. Taakkua marluk Shea Shepherdimi ilaasortaapput, politiinillu tigusarineqarput angallatinik, niisarnanik nunap tungaanut ungoorisunik, akornusersuimmata.
Savalimmiuni politiit taamatut paasissutissiipput.
Ataasinngormat ullaassakkut Savalimmiuni illoqarfiit annersaata tulliata Klaksvigip eqqannguani niisarnat takuneqarsimapput.
Sea Shepherd umiarsuarmik Sam Simon-imik tamaanga takkutipallappoq. Angallat mikineq singinneqarpoq, taannalu arsaarinnissutigineqarpoq issimasullu marluk tigusarineqarlutik.
– Marluullutik iperagaaqqipput, suliassarlu unnerluussisunut saqqummiunneqarpoq, tassani isummerfigineqassalluni suliassaq Savalimmiut Eqqartuussivianni suliarineqassanersoq, politiit tusagassiorfinnut nalunaarutikkut paasissutissiipput.
Niisarnat pisarineqanngillat
Shea Shepherdimeersut nuannaarutigeqisaannik niisarnat, 30-40-nik amerlassusillit, pisarineqanngillat. Sysselmandili Karl Johansen naapertorlugu Sea Shepherd tamatumunnga pisuunngilaq. Niisarnat aqqaqattaarsimaqaat ungooruminaallutillu. Akunnerni pingasuni niisarnat Klaksvigip tungaanut ungooreerlugillu niisarnat aqqaqqipput takuneqaqqinnatillu, piniarnerlu taamaatiinnarneqarpoq.
Ukiut aappassaa tulleriisiinnarlugu Shea Shepherd Savalimmiuni niisarnarniarnermut annertuumik akerlilersuivoq. Avatangiisinik illersuiniaqatigiit tikinnissaannut oqartussaasut siorna pinermissut piareersarluarsimapput. Siornamut sanilliullugu Sea Shepherd umiarsuarnik amerlanerusunik Savalimmiut eqqaaniititsivoq, taamaattumillu sakkutuut umiarsuaat ´Triton´ aamma ´Knud Rasmussen´ Savalimmiuniipput. Ataasinngormat niisarnanik ungooriniarnermi marluullutik najuussimapput. Sakkutuut umiarsuaat aamma sukkasuulianik angallataateqarput.
Pikkorissarnermi angusisimassapput
Savalimmiuni oqartussaasut aamma allatigut piareersarsimapput. Taamaallaat inuit pikkorissartinneqarsimasut niisarnarniaqataasinnaapput. Niisarnanut inatsit sakkortusineqarsimavoq, taamaasilluni inuit niisarnarniarnermi peqataasut niisarnanik ungooriffimmiissinnaallutik.
Sinerissami susassaqanngitsut ingalassimassumiissapput. Niisarnanut inatsimmik annertuumik unioqqutitsineq akilisiitaarujussuarnermik ukiullu marluk angullugit parnaarussaanermik kinguneqarsinnaavoq.
Ilanngullugulu politiit inunnik, niisarnarniarnermik akornusersuiartorlutik Savalimmiunukartunik, akunnerni 36-ini tigummisaqarsinnaapput.